Azərbaycan, Bakı, 20 fevral / Trend müxbir İ.Xəlilova/ Azərbaycanın Vergilər Nazirliyinin məlumatına görə, 2008-ci il yanvarda dövlət büdcəsinə 11 vergi daxilolmaları növündən yalnız ikisi üzrə- ƏDV və gəlir vergisi üzrə proqnoz göstəriciləri yerinə yetirilməyib. Vergilər Nazirliyi xətti üzrə doqquz vergidən əlavə dövlət rüsumu və digər daxilolamalar toplanır.
Vergi daxilolmalarında ən yüksək xüsusi çəki (75,8 faiz) mənfəət vergisində qeyd olunub ki, bu da 2006-cı ildə Bakı-Tbilisi-Ceyhan ƏİB-in istismara verilməsi və bu vergi üzrə podrat, subpodrat şirkətləri tərəfindən ödəmələrlə əlaqədardır. Hesabat dövrü ərzində mənfəət vergisi üzrə daxilolmalar 579,362 mln. manat təşkil edib və proqnoz 141,5 faiz yerinə yetirilib.
Xüsusi çəkisinə (6,6 faiz) görə ikinci yerdə ƏDV üzrə daxilolmalar dayanır və 50,751 mln. manat təşkil edib. Proqnoz 77,8 faiz yerinə yetirlib. Fiziki şəxslərin gəlir vergisi üzrə (xüsusi çəkisi 5 fazi) daxilolmalar 38,171 mln. təşkil edib ki, bu da proqnozlaşdırılan həcmdən 23,6 faiz azdır.
Hesabat dövrü ərzində aksiz vergisi üzrə (3,2 faiz) daxilolmalar 24,359 mln. manat təşkil edib və bu, proqnozdan 1,1 faiz çoxdur. Mədən vergisi üzrə (1,8 faiz) proqnoz 153,6 faiz icra edilib və 13,888 mln. manat daxil olub. Əmlak vergisi üzrə (2,3 faiz) 17,92 mln. manat daxil olub ki, bu da 2,5 dəfə çoxdur. Sadələşdirilmiş vergi daxilolmaları (0,9 faiz) 6,672 mln. manat təşkil edərək, 158,7 faiz həyata keçirilib. Torpaq vergisi üzrə (1,3 faiz) daxilolmalar 5,1 dəfə artaraq 10,181 mln. manat, yol vergisi üzrə (0,7 faiz) isə 5,603 mln. manat olub ki, bu da proqnozdan 3,2 dəfə çoxdur.
Dövlət rüsumi xətti ilə proqnoz göstəriciləri, ümumi daxilolmalarda xüsusi çəkisi 0,5 faiz olmaqla, 106,5 faiz - 3,706 mln. manat icra edilib. Digər daxilolmalar xətti üzrə (1,8 faiz) 13,854 mln. manat daxil olub və proqnoz 101,3 faiz icra edilib.
Ümumilikdə, yanvarda Vergilər Nazirliyi xətti üzrə proqnoz129,5 faiz yerinə yetirilib, deməli, proqnozlaşdırılan 590,174 mln. manata qarşı 764,466 mln. manat daxil olub.
Vergilər Nazirliyi üçün 2008-ci ilə olan proqnoz 5 mlrd. manat səviyyəsində qoyulub.
