Azərbaycan, Bakı, 28 fevral / Trend , müxbir İ.Xəlilova / Azərbaycan İqtisadi İnkişaf Nazirliyinin məişət tullantılarının yandırılması üçün zavod tikintisinin layihəsinə dair məsləhətçisi - Britaniyanın "Curry& Brown" şirkəti, gələn həftə komissiyaların, tenderdə iştirak edən podratçı şirkətlərin təkliflərinin qiymətləndirilməsinə dair hesabatı təqdim edəcək, - İqtisadi İnkişaf Nazirliyinin İnvestisiya Siyasəti şöbəsinin rəhbəri Əsgər Ələkbərov deyib.
Onun sözlərinə görə, tenderin qalibi martın sonunadək elan ediləcək və yayın əvvəlində podratçı zavoun tikintisinə başlayacaq. Bakı ərazisinin məişət tullantılarından tam təmizlənməsi üçün "Təmiz şəhər" ASC yaradılıb.
Tenderdə dörd şirkət - Fransanın "CNIM", Avstriyanın "EVN", Almaniyanın "Enconi" və Rusiyanın "Moskekostroy/Mosspetsstroy" şirkətləri iştirak edib.
Layihənin maliyyələşdirilməsini hökumət öz üzərinə götürür.
Zavodun Balaxanıda, hazırki məişət tullantıları poliqonu ərazisinin yaxınlığında tikilməsi nəzərdə tutulub. Onun illik gücü 500 min ton təşkil edəcək. Podratçı üçün əsas şərt, müəssisənin ən yaxşı texnologiya ilə tikilməsi və enerji alınmasıdır.
Rəsmi məlumatlara görə, Bakıda və onun hüdudlarında ildə təxminən 1 mln. ton məişət tullantısı yığılır.
Hazırda Bakının ətrafında üç məişət tullantıları poliqonu var.
Müəlliflə əlaqə ünvanı: [email protected]