Azrəbaycan, Bakı, 29 fevral / Trend , müxbir İ.Xalilova/ Bakı Banklararası Valyuta Birjası (BBVB) Moldova Fond Birjası (MOLDSE) ilə əməkdaşlıq və tərəfdaşlıq haqqında razılaşma əldə edib, - cümə axşamı Birjadan məlumat verilib.
BBVB-nin rəhbəri Fərhad Əmirbəyov və MOLDSE-nin prezidenti Korneliu Dodu fevralın 28-də Kişinyov şəhərində qarşılıqlı əməkdaşlıq haqqında Saziş imzalayıblar.
Tərəflərin imzaladığı sənəddə Azərbaycan və Moldova maliyyə bazarlarının inkişafı məqsədilə birjaların sıx əməkdaşlığı nəzərdə tutulub. Tərəflər həmçinin birja əməliyyatları risklərinin idarə edilməsi sahəsində fəal təcrübə mübadiləsi aparmaq və beynəlxalq maliyyə təşkilatları ilə qarşılıqlı əlaqələrin yaradılması üzrə birgə tədbirlər keçirək niyyətindədirlər. BBVB və MOLDSE arasında qarşılıqlı əməkdaşlıq Sazişinin bəndləri iki ölkənin maliyyə bazarlarının inkişafına dair müntəzəm informasiya mübadiləsi, eləcə də maliyyə xidmətləri bazarının müxtəlif seqmentlərinin vəziyyəti, o cümlədən əsas emitent və investorlara aid məlumatların təhlilinə həsr olunub.
Bundan əlavə, Moldova paytaxtında keçirilən danışıqların yekunları üzrə tərəflər informasiya, ticarət və hesablaşma təcrübələrinin mübadiləsi xeyrinə öz fikirlərini bildiriblər. BBVB və MOLDSE-nin yaxın planlarına əməkdaşların peşəkarlıqlarının artırılması üçün ikitərəfli treninq kursları və təhsil proqramlarının təşkil olunması daxil olub.
Qapalı tipli Səhmdar Cəmiyyəti kimi təsis olunmuş MOLDSE, özünütənzimləyən qeyri-kommersiya təşkilatı statusuna malikdir. Bu cür təşkilat olaraq, Moldovanın Fond Birjası ölkənin qiymətli kağızlar bazarının müvafiq səlahiyyətləri olan vahid tənzimləmə mexanizminin tərkib hissəsidir. Birjanın yaradılmasında Moldovanın qiymətli kağızlar bazarının 34 peşəkar iştirakçısının əli olub. MOLDSE-də keçirilən ilk əqdlər 1995-ci il iyunun 26-na təsadüf edib. 1995-ci ilin mayından etibarən, MOLDSE Avrasiya Birjaları Federasiyasının (FEAS) fəal üzvüdür. Beynəlxalq Inkişaf üzrə ABŞ Agentliyinin (USAİD) dəstəyi ilə Birja 1998-ci ildə hərracların elektron texnologiyalarını tətbiq edib. 1998-ci ildə MOLDSE Moldovanın Qiymətli Kağızlarının Milli Depozitar Mərkəzinin təsisçisi kimi çıxış edib. 2007-ci ilin yekunlarına görə, onun dövriyyəsi dollar ekvivalentində 109,5 milyon təşkil edib.
Müəlliflə əlaqə ünvanı: [email protected]
