Azərbaycan, Bakı, 09 aprel/ " müxbir Ü.İsmayılova/ Azərbaycanda sığorta ödəmələrinin zəmanət Fondu yaradılacaq. Bu barədə çərşənbə axşamı Azərbaycan Maliyyə Nazirliyinin dövlət sığorta nəzarəti şöbəsinin rəhbəri Namiq Xəlilov məlumat verib.
"Fond, iflasa uğradıqları halda, sığorta şirkətlərinin ödəmələrini sığortalayacaq", - Xəlilov bildirib. Fond yalnız sığortanın müəyyən (ən riskli) növləri üzrə sığorta ödəmələrinə zəmanət verəcək. Hazırda fəaliyyət göstərən bütün sığorta şirkətləri Fondun üzvü olacaqlar. Belə ki, bu üzvlük sığorta fəaliyyətinin aparılması üçün lisenziyanın bəndlərindən biri olacaq.
Sığorta ödəmələrinin zəmanət Fondu dünya təcrübəsində sığortaçıların dövlət zəmanətinin təmin edilməsi məqsədilə istifadə edilir. Fondun əsas vəzifəsi sığorta təşkilatlarının məcburi ləğvi ilə sığortaçıların əmlak maraqlarının müdafiəsidir.
Əsas vəzifənin yerinə yetirilməsi üçün Fond, adətən, aşağıdakı funksiyaları həyata keçirir:
- Zəmanət və kompensasiya ödəmələrinin həyata keçirilməsi;
- İştirakçı sığorta təşkilatlarından məcburi və fövqəladə üzvlük haqqlarının cəlb edilməsi;
- Ölkə qanunvericiliyi ilə müəyyən edilmiş qaydada investisiya fəaliyyəti.
Müəlliflə əlaqə saxlamaq üçün elektron ünvan: [email protected]
