Azərbaycan, Bakı, 17 may/ Trend , müxbir İ.Xəlilova/ Bu gün Azərbaycanın nümayəndə heyəti Avropa Yenidənqurma və İnkişaf Bankının İdarəçilər Şurasının XVII iclasının işində iştirak etmək üçün iqtisadi inkişaf nazirinin müavini Mikayıl Cabbarovun başçılığı altında Kiyevə yola düüşb. Bu barədə şənbə günü ölkənin İqtisadi İnkişaf Nazirliyindən məlumat veriblər. AR-dən bankda idarəçi iqtisadi inkişaf naziri Heydər Babayevdir. İclas mayın 18-19-na təyin edilib.
AYİB-in İdarəçilər Şurasının ənənəvi iclası ilə paralel olaraq bu il "Müasir iqtisadiyyata yeni enerji" mövzusunə həsr olunmuş İşgüzar Forumun illik görüşü baş tutacaq. Azərbaycanın bank sektorunun və işgüzar dairələrinin nümayəndələrinin iştirak edəcəkləri forum çərçivəsində Avropa Bankının Azərbaycanın AGBank-a kiçik və orta biznesin, ticarətin inkişafına $19,5 mln. ayırması haqqında kredit müqaviləsinin imzalanması baş tutacaq.
Son on ildə AYİB-in əhatə etdiyi bütün regionda əldə edilmiş irəliləyişlər iki gün davam edəcək disskusiyaların mərkəzi mövzusu olacaq. Region ölkələrinin, xüsusilə də iqtisadi artımın qlobal azalma templərinin mümkün nəticələri, maliyyə bazarlarında bir müddət əvvəl baş verən hadisələr və yenidən yaranan inflyasiyanın artım təhlükəsi fonunda hələ də qarşılaşdıqları çətinliklər də gündəlikdə xüsusi yer alacaq.
AYİB İdarəçilər Şurası iclasda AYİB-in səhmdarı olan Türkiyənin oktyabrın sonunadək bankdan sərmayə alan ölkələr sırasına daxil olub-olmayacağı barədə bankın qərarının qəbul edilməsi tarixinin açıqlanması haqqında təklif üzrə səsvermə keçirəcək.
Bankın idarəçiləri regionda gələcək investisiyaların həyata keçirilməsinə hazırlıq məqsədilə AYİB-in 2007-ci ildə 1,1 mlrd. avro məbləğində xalis gəlirinin 80 faizinin ehtiyata keçirilməsi haqqında təklif üzrə qərar qəbul edəcək. Bununla yanaşı, AYİB tarixində ilk dəfə olaraq bankın həyata keçirdiyi layihələrin dəstəklənməsində texniki əməkdaşlığın maliyyələşdirilməsi üçün nəzərdə tutulan yeni fonda 115 mln. avro ayrılması haqqında daha bir təklif gündəliyə çıxarılacaq.
1986-cı ildə dünyada ən böyük qəzanın baş verdiyi Çernobıl atom elektrik stansiyasında təhlükəsizliyin təmin edilməsi üzrə beynəlxalq səylərə töhfə qisimində əvəzsiz olaraq daha 135 mln. avro ayrılmalıdır. Bununla əlaqədar, müvafiq qətnamə layihəsi idarəçilərə təqdim edilib. AYİB beynəlxalq donorlar tərəfindən formalaşdırılmış fondu idarə edir. Bu fondun vəsaitləri hesabına Çernobıl qəzasının nəticələrinin aradan qaldırılması üzrə işlərin maliyyələşdirilməsi həyata keçirilir və mayın 20-də AYİB prezidenti Jan Lemyer iclas iştirakçıları ilə birlikdə bu obyektə baş çəkəcək.
AYİB başçısı sonuncu dəfə olaraq hazırki vəzifəsində illik iclasda iştirak edəcək. İyulun 3-də o, iki tam dördillik AYİB rəhbəri vəzifəsini tutuduqdan sonra öz vəzifəsini tərk edir. Onun varisi kimi Almaniyanın Maliyyə Nazirliyinin dövlət katibi Tomas Mirovun namizədliyi irəli sürülüb.
2007-ci ildə AYİB tərəfindən regiona 5,6 mlrd. avro sərmayə yatırılıb. Bu vəsaitin 90 faizi 2004-cü ildə Aİ-yə daxil olmuş səkkiz ölkənin sırasında daxil olmayan ölkələrə yönəldilib. İl ərzində AYİB regionun müxtəlif ölkələrində müsəssisələrin səhmdar kapitalına yatırımlarını genişləndirərək riskə getmək bacarığını nümayiş etdirib və yoxsul ölkələrdə sərmayələrinin həcmini artırıb. Ümumi investisiya həcmindən təqribən 20 faiz AYİB-in enerji təhlükəsizliyinin təmin edilməsinin əsas şərti kimi nəzərdən keçirdiyi enerji ilə təchizat sahəsindəki layihələrin maliyyələşdirilməsinə yönəldilib.
Bundan əlavə, İşgüzar Forumun görüşü çərçivəsində enerji ehtiyatları çatışmazlığının aradan qaldırılması məqsədilə bərpa olunan yanacaq növlərinin istifadəsi və infrastruktura sərmayə yatırılması kimi məsələlər qruplarda müzakirələrə çıxarılacaq. Digər mövzular arasında regionun bütün ölkələrində korporativ normaların və sosial məsuliyyətin tətbiqi üzrə səylər, böyük ehtimalla AYİB-in əməliyyat ölkələrində siyasi gələcəyi müəyyən edəcək orta sinifin artımı, həmçinin sənayenin yüksək texnologiyalı sahələrində yaranan tendensiyalara dair mövzular var.
Həm Forumda qrupların iclaslarında, həm də mayın 20-də Kiyevdə keçiriləcək İllik Məşvərətdən sonra ayrıca konfransda ərzağın qiymətinin artması probleminə mühüm yer ayrılır. AYİB iqtisadiyyatın bu sahəsindəki yeni çağırışa kənd təsərrüfatı sektorunda əlavə investisiyalara və güclü potensialdan istifadəyə yardım işində dövlət orqanlarının və özəl aqrosənaye şirkətlərinin səylərinin birləşdirilməsinə dair tədbirlərlə cavab verib. AYİB Forumun gedişində bu region üzrə ən yeni iqtisadi proqnozlarını açıqlayacaq.
Avropa bankı Azərbaycanda özəl sektorun və regionların inkişafına yönəlmiş layihələrin reallaşdırılmasında maraqlı olduğunu bildirib. AYİB 2008-ci ildə Azərbaycanda ümumi dəyəri 140-180 mln. avro təşkil edən 18 layihənin maliyyələşdirmə imkanlarını müzakirə edir. Onlardan səkkizi sahibkarların maliyyələşdirilməsinə yönəlmiş kiçik layihələrdir. Lakin iki-üç layihə sahibkarlıq fəaliyyətinin inkişafı ilə bağlıdır. Bank sektorunun gücləndirilməsi üçün 60 mln. avro ayırmaq planlaşdırılır. Bu vəsait kiçik və orta biznesin dəstəklənməsi, ipoteka kreditləşməsi, mikromaliyyələşdirmə üçün nəzərdə tutulub. Bu gün Avropa Bankı Azərbaycanın səkkiz bankı ilə işləyir.
Bundan əlavə, ölkə hökuməti ilə infrastruktur layihələrinin, xüsusilə də avtomobil yollarının yenidən qurulmasında, dəmir yolu infrastrukturunun təkmilləşdirilməsi sahələrində layihələrin maliyyələşdirilməsi üzrə danışıqlar aparılır.
Azərbaycanda fəaliyyətə başladığı vaxtdan Avropa Bankının Azərbaycanın layihələrindəki şəxsi maliyyələşdirmə portfeli $1 mlrd. təşkil edir. Birgə maliyyələşdirilən layihələr nəzərə alınmaqla portfel $4 mlrd.-dək çatır. AYİB 2007-ci il iyunun 30-u üçün 61 layihənin reallaşdırılmasına 482,4 mln. avro ayırıb.
Mayın 17-nə olan rəsmi məzənnə - 0,8274 AZN/USD
Müəlliflə əlaqə saxlamaq üçün elektron ünvan: [email protected]
