Azərbaycan, Bakı, 26 may / Trend / İlkin hesablamalara görə, 2010-cu ildə Bakı-Tbilisi-Qars dəmir yolu marşrutu üzrə 1,5 mln. sərnişin və 3 mln. ton yük daşınacaq. Bu barədə rəsmi mətbuata müsahibəsində "Dəmiryolservis" MMC-nin direktoru Ələşrəf Lütvəlibəyov məlumat verib.
Dəmir yolu layihəsinin açılış layihəsinin reallaşdırılmasının 2009-cu ildə başa çatdırılması planlaşdırılır. O vaxtadək Mərmərə layihəsi - Bosforun altı ilə tunelin tikintisi başa çatdırılacaq. Bu, Avropaya dəmir yol əlaqəsinin açılmasına imkan yaradacaq.
Azərbaycanın "Azərinşaatservis" tikinti şirkəti Gürcüstanda yolun 29 km -lik hissəsinin tikinti layihəsi üzrə tenderin qalibi olub və onun tikintisini həyata keçirməyə başlayıb. "Azərinşaatservis"lə bağlanan müqavilənin ümumi dəyəri 79 mln. dollar təşkil edir. 2009-cu il oktyabrın 1-dək işlərin başa çatdırılması nəzərdə tutulub. Gürcüstandakı tikinti və layihə işlərinin maliyyələşdrilməsi Azərbaycan tərəfindən ayrılan 200 mln. dollar həcmində kredit hesabına həyata keçirilir.
"Bakı - Tbilisi - Qars" layihəsi çərçivəsində yeni 105 kilometrlik dəmir yolu qolunun tikintisi planlaşdırılır. Bunun 76 km- i Turkiyə ərazisindən, 29 km-i Gürcüstan ərazisindən keçəcək.
Gürcüstanda yükdaşınma gücünü ildə 15 mln. tona çatdırmaq məqsədilə 183 km-lik Axalkalaki-Marabda-Tbilisi dəmir yolu sahəsi yenidən qurulacaq. Axalkalakidə Gürcüstanda mövcud xətlərdə Avropa standartlarına uyğun qatarların keçid məntəqəsinin tikilməsi planlaşdırılır. Layihə 422 mln. dollar məbləğində qiymətləndirilir. Lakin infrastrukturla yanaşı, 600 mln. dollar həcmində dəyərləndirilir.
