QTİB Azərbaycan banklarına ikinci ipoteka kreditini açır

Azərbaycan, Bakı, 02 iyun/ Trend , müxbir İ.Xəlilova/ İyunun 3-də yarımdövlət Kapital Bank və Qara dəniz Ticarət və İnkişaf Bankı (QTİB) arasında ipoteka maliyyələşdirməsi üçün $12 mln. məbləğində kreditin ayrılmasına dair saziş imzalanacaq. Bu barədə bazar ertəsi Kapital Bank-ın Strateji İnkişaf və Marketinq Departamentinin direktoru Samirə Şərifova məlumat verib.

Bankın adından sazişi İdarə Heyətinin sədri Rauf Rzayev, QTİB-dən bankda maliyyə institutları üzrə direktor Andrey Butin imzalayacaqlar.

Kredit Qara dəniz bankı tərəfindən altı il müddətinə tədqim ediləcək və Kapital Bank da bu vəsaiti 6 il müddətinə yerləşdirmək niyyətindədir. Bankın ipoteka kreditləri üzrə təqribi dərəcə illik 12-13 faiz olacaq.

Şərifovanın sözlərinə görə, Kapital Bank QTİB-in vəsaitlərinin cəlb edilməsi ilə özünün ipoteka proqramının reallaşdırılmasına başlayacaq.

Qara dəniz bankı $8 mln. məbləğində birinci krediti altı il müddətin və illik libor+3,7 faiz dərəcə ilə Texnika Bank-a təqdim edib.

Hazırda banklar mənzil alqısına özlərinin ipoteka proqramları çərçivəsində kredit ayırırlar. Belə ki, Azərbaycan Milli Bankı nəzdində fəaliyyət göstərən Azərbaycan İpoteka Fondu vəsait çatışmazlığına görə ötən ilin yayından yeni ipoteka kreditlərinin verilməsini dayandırıb. İndiyədək büdcə vəsaitləri hesabına, AİF tərəfindən 15 ilədək müddətlə və illik 4 faizdən 8 faizədək dərəcə üzrə 46 mln. kredit verilib.

İyunun 2-nə olan rəsmi məzənnə - 0,8201 AZN/USD.

Müəlliflə əlaqə saxlamaq üçün elektron ünvan: [email protected]