Azərbaycan, Bakı, 10 iyul / Trend , müxbir U.İsmayılova/ Azərbaycan Sığortaçılar Assosiasiyası hər il Beynəlxalq Sığorta Forumu keçirməyi planlaşdırır, ilk forum cümə axşamı Bakıda baş tutub.
"Bu gün keçirilən sığortaçılar forumu ilk dəfə olaraq təşkil olunub, lakin biz bunu hər il keçirmək niyyətindəyik", - deyə Assosiasiyanın İdarə Heyətinin sədri Kamal İbrahimov bildirib.
Azərbaycan Sığortaçılar Assosiasiyası tərəfindən təşkil olunan forum iyulun 10 -11 - də keçirilir.
Forum Azərbaycanın sığorta bazarının inkişaf tendensiyaları, Avropa ölkələri sığorta bazarı təcrübəsinin Azərbaycanın sığorta sektorunun inikşafına təsiri, həyat sığortasının inkişafı, Azərbaycanın sığorta bazarının ölkənin maliyyə sistemi və sığortada korporotiv idarəçilik kimi təhlilinə həsr olunub.
İbrahimovun sözlərinə görə, forumda 15 xarici sığorta və təkrar sığorta şirkəti iştirak edir. Forumda ümumilikdə 150 nəfər iştirak edir.
İbrahimov hesab edir ki, forum Azərbaycanın sığorta bazarının gələcək inkişafına böyük imkanlar açacaq.
Ötən il bir nəfərə düşən sığorta haqqı həcmi 17,2 manat təşkil edib ki, bu da 2003-cü ilin göstəricilərindən 2,3 dəfə çoxdur. Azərbaycanın sığorta şirkətlərinin Nizamnamə kapitalının həcmi 2007-ci ildə 63,4 mln. manat təşkil edib ki, bu da 2003-cü ilin göstəricilərindən 3,5 dəfə çoxdur. Cari ilin birinci rübündə sektorda artım 35 faizə çatıb.
"Standard Insurance" "Bakı Sigorta", "ATA Sigorta", "AzerSigorta", "Atesgah", "AZ Sigorta", "Beynelxalg Sigorta Sirketi", "AzRE tekrarsigorta", "MBASK" şirkətləri və "Rusiya" Sığorta Cəmiyyəti forumun rəsmi sponsorlarıdır. Sponsor qismində "Audatex", "FADATA", "A Group", "Alfa Insurance", "Polish Reinsurance Company", "ROSNO", "Thames Insurance Group", "UnityRe", "SFS", "Ingosstrakh", "Qarant Siğorta" şirkətləri çıxış edir.
İnformasiya dəstəyi Trend -a məxsusdur.
Məqalə müəllifi ilə əlaqə ünvanı: Capital