Azərbaycan, Bakı, 15 iyul/ Trend , müxbir Ü.İsmayılova/Azərbaycanın beynəlxalq maliyyə hesabatları standartlarına (BMHS) keçməsi prosesi çətinliklə gedir, - çərşənbə axşamı Auditor Palatası sədrinin elmi məsələlər üzrə müşaviri Nəcəf Talıbov deyib.
"Bu, çox vaxt tələb edən uzun və çətin prosesdir", - Talıbov bildirib.
Nazirlər Kabinetinin bir neçə il bundan əvvəl təsdiq etdiyi siyahı üzrə, 20 ictimai əhəmiyyətli təşkilat 2008-ci ilin yanvarın 1-dək BMHS əsasında mühasibat işini aparmağa başlamalı və maliyyə hesabatını təqdim etməli idi.
Lakin hazırda hesabatların yeni planına yalnız bank təşkilatları bütünlüklə keçiblər. Onlar 2004-cü ildə Milli Banka hesabatları iki - beynəlxalq və yerli standart üzrə təqdim edirdilər.
Talıbovun sözlərinə görə, sovet vaxtında müəyyən edilmiş qaydalar üzrə maliyyə hesabatları ilə məşğul olan minlərlə insanı, tezliklə digər maliyyə hesabatlarına keçməyə məcbur etmək qeyri-mümkündür.
"Bir neçə il əvvəl bütün dövlət və qeyri-dövlət təşkilatlarında avtomatlaşdırılmış kompüter sisteminin tətbiqi də qeyri-real görünürdü. İnsanlar tədricən dünya maliyyə- hesabat sisteminin ümumi qəbul edilmiş dili olan BMHS - ə də alışacaqlar", - Talıbov qeyd edib.
Ölkədə BMHS-in tətbiqi ilə sərmayə iqlimi də yaxşılaşacaq və sərmayədarlar üçün vahid qayda üzrə maliyyə hesabatlarını aparmaq asan olacaq.
Müşavirin fikrincə, BMHS korrupsiyanın ləğvinə və ölkənin hesablama sistemində tam şəffaflığın tətbiqinə kömək edəcək.
"Azərbaycanda beynəlxalq standartların tətbiqi dünya iqtisadiyyatına inteqrasiya yolunda daha bir əhəmiyyətli addım olacaq", - Talıbov deyib.
Azərbaycanın "Mühasibat uçotu haqqında" Qanununda göstərilib ki, kommersiya təşkilatlarında milli mühasibat standartlarının tətbiqi 2007-ci ilin sonunadək başa çatdırılmalı, büdcə və qeyri-hökumət təşkilatları isə bu prosesi 2008-ci ilin sonunadək bitirməlidir. Kiçik və orta müəssisələr üçün 2006-cı il yanvarın 1-dək vaxt ayrılıb.
Bələdiyyə, büdcə təşkilatları və dövlət fondları üçün müəyyən edilən son müddət 2009-cu il yanvarın 1-dəkdir.