Azərbaycan, Bakı, 30 iyul / Trend , müxbir S.Babayeva/ Azərbaycanın Standartlaşdırma, Metrologiya və Patent üzrə Dövlət Agentliyi Atom Enerjisi üzrə Beynəlxalq Agentliyin (MAQATE) dəstəyi ilə radiasiya fonunun ölçülməsi üzrə kalibrləmə laboratoriya binasının tikintisi üçün hökumətdən vəsait istəyib. Bu barədə Agentlik Aparatının rəhbəri Arif Əşrəfov məlumat verib.
"Razılaşmaya əsasən, laboratoriya üçün binanı biz tikməliyik. Bunun üçün böyük vəsait tələb olunur", - deyə o bildirib.
Onun sözlərinə görə, laboratoriya binasının tikintisi Azərbaycana 30 mln. manata başa gələ bilər. 10 metr qalınlıqlı divara malik olacaq bina yerin altında yerləşəcək.
Laboratoriya üçün 1,5 mln. avro dəyərində lazım olan avadanlıqlar MAQATE tərəfindən təqdim olunacaq.
Laboratoriyanın 2009-cu ildə istifadəyə verilməsi planlaşdırılır. Azərbaycanın Standartlaşdırma, Metrologiya və Patent üzrə Dövlət Agentliyi 2001-ci ilin dekabrında ölkə prezidentinin fərmanı ilə yaradılıb. O, İcra Hakimiyyətinin standartlaşdırma, mertologiya, sertifikatlaşdırma və sənaye mülkiyyəti obyektlərinin mühafizəsi sahələrində dövlət siyasətinin formalaşdırılması və aparılması üzrə mərkəzi orqanıdır.
Atom Enerjisi üzrə Beynəlxalq Agentlik (MAQATE) dünyada nüvə texnologiyalarından sülh məqsədləri üçün istifadə sahəsində elmi-texniki əməkdaşlığın aparıcı beynəlxalq hökumət forumudur. 1957-ci ildə atom təşkilatı qismində BMT çərçivəsində yaradılan MAQATE 1953-cü ildə BMT Baş Assambleyasının sessiyasında ABŞ prezidenti Eyzenhauerin "Atom sülh üçündür" nitqi zamanı ifadə etdiyi təkliflərin reallaşdırılması üzrə beynəlxalq səylərin kuliminasiyasından ibarətdir. O, atom enerjisi istifadəsinə nəzarət və onun inkişafı üzrə beynəlxalq orqanın yaradılmasını qabaqcadan görmüşdü. Bu gün Agentliyin fəaliyyətinin xidmət, proqram və növlərinin geniş spektri ona üzv 130 dövlətin tələbatlarına əsaslanır.