Azərbaycan, Bakı, 13 avqust/ Trend müxbir İ.Xəlilova/ Cənubi Koreyanın SK C& C Konsorsiumu sentyabrın sonunda Bakıda "Nəqliyyatın intellektual idarəsi" sisteminin yaradılması layihəsinin realizəsinə başlayır. Bu barədə çərşənbə günü Nəqliyyat Nazirliyinin Nəqliyyat Siyasəti və İqtisadiyyat Şöbəsinin direktoru Sədrəddin Məmmədov məlumat verib.
Onun sözlərinə görə, hazırda şirkət layihənin ətraflı layihələndirilməsini hazırlayır.
İlkin məlumatlara əsasən, belə sistemin yaradılması $55-60 mln. qiymətləndirilir. Əvvəllər $52 mln. barədə bəyanatlar verilib. Bu vəsaitləri dövlət büdcəsindən cəlb etmək planlaşdırılır.
Başlanğıcdan Koreyanın Nəqliyyat Nazirliyi bu sistemin tətbiqində Azərbaycana yardım göstərib. 2004 - cü il aprelin 24 - də bu ölkənin Nəqliyyat Nazirliyi ilə Seulda Niyyət memorandumu imzalanıb. Nazirlik üçün layihəni SK C& C Şirkəti hazırlayıb. O, araşdırmalar apararaq müvafiq tövsiyələri ölkə hökumətinə təqdim edib. Lakin 2008 - ci ilin mayında onunla podrat xidmətlərinin göstərilməsinə dair memorandum imzalanıb.
Araşdırmalara əsasən, belə sistemin tətbiqi nəticəsində, işıqfor və avtobus dayanacaqlarının sayı nizamlanacaq. Körpü və piyada keçidlərinin tikintisi nəticəsində onların sayı onsuz da azalıb. Bu sistemin yaradılması avtonəqliyyat vasitələrinin hərəkəti, sürəti, dayanacaqlar, nəqliyyat qəzaları, tıxaclar və digər hallarda mərkəzi dispetçer məntəqəsinə operativ məlumat göndərməyə imkan verəcək.
Nəqliyyatın intellektual idarəsi sisteminin iki mərhələdə 3,5 il ərzində yaradılması nəzərdə tutulur. Birinci mərhələdə bu sistemi paytaxtın mərkəzindən başlayaraq, Heydər Əliyev prospekti istiqamətində Əzizbəyov dairəsinədək tətbiq etmək nəzərdə tutulur. İkinci mərhələdə sistem bütün paytaxta genişləndiriləcək.
Bakıda belə sistemin yaradılmasının məqsədi bir məntəqədən nəqliyyat sisteminin - sərnişin daşınmaları, avtomobil marşrutlarının, tıxacların təcridi və ləğvi, dayanacaqların idarə edilməsindən ibarətdir.
Avqustun 13-nə olan cari məzənnə -- 0,8131 AZN/USD.
Müəlliflə əlaqə saxlamaq üçün elektron ünvan: [email protected]
