Azərbaycan, Bakı, 14 avqust/ Trend Cap , müxbir İ.Xəlilova/ 2012-ci ilədək Azərbaycan və Rusiya arasında azad ticarət rejimindən çıxarılan malların siyahısı tamamamilə ləğv ediləcək. Bu barədə cümə axşamı RF-nin Azərbaycandakı ticarət nümayəndəsi Yuri Şedrin məlumat verib.
Onun sözlərinə görə, hazırda bu siyahıya likör-araq, pivə məhsulları və tütün məmulatları daxil edilib. Ölkələr arasında qarşılıqlı ticarətdə yalnız bu mallara gömrük rüsumu tətbiq edilir. 1992 - ci il 30 sentyabr tarixli azad ticarət haqqında hökumətlərarası sazişə imzalanan protokola əsasən, çıxarılan malların ləğvi mərhələli şəkildə həyata keçirilir. 2005 - ci ildə şəkər məhsulları bu siyahıdan çıxarılıb ki, bu da hazırki gündə çox aktualdır. Belə ki, Azərbaycan Rusiyaya şəkər və təmiz saxaroza ixracına başlayıb.
Şedrin bildirib ki, hazırda danışıqlar üzrə səlahiyyət RF İqtisadi İnkişaf Nazirliyindən Sənaye və Ticarət Nazirliyinə keçir.
Müəlliflə əlaqə saxlamaq üçün elektron ünvan: [email protected]
