Azərbaycan, Bakı, 27 avqust / Trend , müxbir S.Babayeva/ Azərbaycan prezidenti İlham Əliyev "Ekoloji təmiz kənd təsərrüfatı haqqında" Qanunun tətbiqinə dair fərman imzalayıb.
Sənəddə bildirilir ki, Nazirlər Kabinetinə iki ay müddətində müvafiq icra hakimiyyəti orqanları ilə birgə qüvvədə olan qanunvericilik aktlarının adı çəkilən Qanuna uyğunlaşdırılması barədə təkliflərin hazırlanması, həmçinin, qanun pozuntusuna görə məsuliyyət növlərini müəyyən edən qanunvericilik aktının hazırlanması; ekoloji təmiz və ənənəvi kənd təsərrüfatı üsülları ilə məhsul istehsalı qaydalarının müəyyən edilməsi; ekoloji təmiz kənd təsərrüfatında istifadə üçün təbii və qeyri-təbii vasitələrin siyahısının müəyyən edilməsi, milli və beynəlxalq standartlar nəzərə alınmaqla, ərzaq məhsulları dövriyyəsi qaydalarının müəyyən edilməsi, Qanunun reallaşdırılmasına görə məsul olan "müvafiq icra hakimiyyəti orqanlarının" səlahiyyətlərinin müəyyən edilməsi barədə tapşırıq verilib.
Fərman 2008 - ci il avqustun 25 - də qüvvəyə minib.
"Ekoloji təmiz kənd təsərrüfatı haqqında" Qanun 5 fəsil və 23 maddədən ibarətdir. Yeni Qanun ərzaq mallarının istehsalı, emalı, dövriyyəsi və əhali, torpaq, su, bitki və heyvanların sağlamlıq və təhlükəsizliyini təmin edən ekoloji təmiz kənd təsərrüfatı ilə bağlı münasibətləri nizamlayır.