Azərbaycan, Bakı, 28 avqust / Trend , müxbir Ü.İsmayılova/ Azərbaycanda respublika prezidentinin əmək pensiyasının sentyabrın 1-dən 75 manatadək artırılması ilə bağlı 25 avqust tarixli sərəncamına əsasən, 1,212 mln. artırılmış pensiya alacaq, - cümə axşamı rəsmi mətbuata müsahibədə Əhalinin Sosial Müdafiəsi Dövlət Fondunun (ƏSMDF) rəhbəri Səlim Müslümov deyib.
Azərbaycanda rəsmi olaraq 1,26 mln. nəfər əmək-təqaüdçüsü qeydə alınıb. Qalan 47,77 min təqaüdçü pensiya səviyyəsinin əmək haqqının artırılmasından asılı olan hərbçilər, xüsusi rütbəli və ya dövlət qulluqçusu olan şəxslərdir.
Müslümov onu da qeyd edib ki, sərəncama uyğun olaraq, milli qəhrəmanların ailə üzvlərinin pensiyası 165 manatadək, şəhid ailələrinin pensiyası 154 manatadək, görmə qabiliyyəti ilə bağlı birinci qrup əlil pensiyaçıların pensiyası 164 manatadək, digər problemlərə görə birinci qrup əlil pensiyaçıların pensiyası 104 manatadək, birinci qrup əlil pensiyaçıların - müharibə iştirakçılarının pensiyası 200,5 manatadək artırılıb.
İkinci qrup əlil pensiyaçıların pensiya səviyyəsi 170,7 manatadək , üçünçü qrup əlil pensiyaçıların pensiyası 155,5 manatadək, qalan üçüncü qrup əlillərin pensiya səviyyəsi 41,25 manatadək artırılıb.
Sosial Sığorta Fonduna vəsait ödəyən şəxslərin sayı 1,71 mln. nəfər təşkil edir.