Azərbaycan, Bakı, 06 oktyabr / Trend , müxbir E.İsmayılov/ Oktyabrın 7- 8 - də Bakıda "Şimal - Cənub" dəmir yolu layihəsi çərçivəsində, Azərbaycan, İran və Rusiya işçi qruplarının görüşü keçiriləcək. Bu barədə bazar ertəsi Azərbaycan Dövlət Dəmir Yol İdarəsindən (DDYİ) bildiriblər.
Görüş zamanı Qəzvin ї Rəşt - Astara (İran) ї Astara (Azərbaycan) dəmir yolunun tikintisi üçün birgə müəssisənin yaradılması layihəsi müzakirə olunacaq.
"Şimal - Cənub" nəqliyyat dəhlizi layihəsi Rusiya, Azərbaycan və İrandan keçməklə, Avropadan Hindistan və Cənub - Şərqi Asiya ölkələrinə vahid dəmir yol əlaqəsinin yaradılmasını nəzərdə tutur.
Layihənin reallaşdırılması üçün 400 mln. dollardan çox vəsait tələb olunur. Belə ki, işlərin böyük hissəsini Azərbaycan ilə sərhəddədək dəmir yolu əlaqəsi olamayan İranda həyata keçirmək lazımdır. 35 - 40 mln. dollar həcmində müəyyən işlər Azərbaycanda görülməlidir.
Azərbaycan ərazisindəki işlərin həcmi Astara (AR) stansiyasınadək təqribən 8,5 km - lik dəmir yolu, təkər cütlərinin əvəzlənməsi sisteminə malik stansiya, sərhəd və gömrük infrastrukturunun tikintisini nəzərdə tutur.
Sərhəd dəmir yol körpüsünün tikintisi də planlaşdırılır. Lakin bu layihənin reallaşdırılması İran ilə paritet əsaslarla həyata keçiriləcək.
Bu dəhlizdə yükdaşımaları ilkin mərhələdə ildə 5 mln. ton proqnozlaşdırılır, gələcəkdə ildə 10 - 15 mln. tonadək artırılması planlaşdırılır.
Məqalə müəllifi ilə əlaqə ünvanı - [email protected]
