Qazaxıstan, Almatı, 16 oktyabr/ Trend , müxbir İ.Xəlilova/ "Xarici şirkətlərin Azərbaycanın qeyri-neft sektoruna marağı azdır, belə ki, onlar indiyədək ölkəni neft ölkəsi kimi qəbul edirlər", - Azərbaycan İnvestisiya Şirkətinin (AİŞ) Hüquqi Ekspertiza Departamentinin hüquqi məsləhətçisi Aqşin Əlizadə Almatıda keçirilən "Mərkəzi Asiya və Qafqaz regionunda korporativ idarəetmə məsələlərinin işıqlandırılması" seminarında bildirib.
"Bu stereotipi aradan qaldırmaq üçün Azərbaycan şirkətlərində texnoloji bazanı yeniləmək, onları dünya bazarına çıxarmaq və satış bazarı ilə təmin etmək lazımdır, - Əlizadə bildirib. - Bunun üçün şirkətləri korporativ səviyyə və beynəlxalq standartlara çıxarmaqla onların cəlbediciliyini artırmaq tələb olunur ki, bu da rəqabətqabiliyyətliliyi yüksəltməyə imkan verəcək".
O hesab edir ki, bir neft ölkəsi kimi Azərbaycan gələcəkdə holland sindromu təhlükəsi qarşısında dayanır və bununla qarşılaşmamaq üçün, qeyri-neft sektorunu inkişaf etdirmək lazımdır.
Bununla əlaqədar dövlətin məqsəd və vəzifələri bu sahəyə sərmayələri artırmaqdan ibarətdir. "Müvafiq korporativ səviyyə və beynəlxalq standartlar olduqda, rəqabətqabiliyyətliliyi yüksəltmək və şirkətlərə birbaşa xarici sərmayələrin artırılması yolu ilə ixrac potensialını inkişaf etdirmək mümkün olacaq", - Əlizadə bildirib.
Nizamnamə kapitalı 90 mln. manat olan AİŞ, görülən tədbirlər çərçivəsində ölkənin qeyri -neft sektorunda altı layihənin realizəsinə 55 mln. manatdan çox sərmayə yatırıb. Əlizadənin sözlərinə görə, yaxın vaxtlarda AİŞ- in kapitalı iki dəfə artırılacaq.
"Şirkətlərə sərmayə yatırarkən, biz onların dövlətin mülkiyyətinə keçməsi məqsədini güdmürük. Bununla əlaqədar AİŞ (100 faizlik dövlət şirkəti) öz sərmayələrini müxtəlif sahələrə diversifikasiya edərək yalnız minoritar səhmdar kimi çıxış edir və bu şirkətlərdə beş ildən çox yubanmağa hazırlaşmır", - AİŞ-in Hüquqi Ekspertiza Departamentinin hüquqi məsləhətçisi bildirib.
AİŞ- in Əsasnaməsinə görə, o bir sahədə məcmu kapitalın 20 faizinədək və bir sahəyə 30 faizdən çox sərmayə yatıra bilər. Əlizadənin sözlərinə görə, bu gün AİŞ üçün kənd təsərrüfatı sektoru, daha doğrusu, şirə və tərəvəzlərin emalı sahələri kimi daha rəqabətqabiliyyətli sahələr daha çox maraq kəsb edir.
"Qlobal ərzaq böhranı fonunda kənd təsərrüfatı sektoru AİŞ-in sərmayələri üçün ən səmərəli sektor ola bilər", - Əlizadə bildirib.
AİŞ artıq Azərbaycanda Azeri Frut Co. meyvə Korporasiyasının yaradılması istiqamətində SAF və Garnet şirə istehsalçıları ilə əməkdaşlıq edir.
İnvestisiya Şirkəti üçün ağır sənaye sahəsi də maraqlıdır. Bununla əlaqədar, artıq Det-AL metallurgiya layihəsinə, poladəritmə və alüminium istehsalına sərmayə yatırılması imkanları nəzərdən keçirilir.
AİŞ prezidentin fərmanı əsasında 2006 - cı ilin martında yaradılıb.
Müəlliflə əlaqə saxlamaq üçün elektron ünvan: [email protected]
