Azərbaycan, Bakı, 06 noyabr/ Trend , müxbir Ü.İsmayılova/ Daşınmaz Əmlakın Dövlət Reyestri Xidmətinin (DƏDRX) mətbuat katibi Yadigar Cəfərli bildirib ki, dünya maliyyə böhranının Azərbaycanın daşınmaz əmlak bazarına köklü təsir etdiyini demək, düzgün olmaz.
"Ölkənin daşınmaz əmlak bazarının bugünkü vəziyyətini ötən ilin analoji dövrü ilə müqayisə etsək, nə ilkin, nə də təkrar bazarda mənfi dəyişikliyin olmadığını sezmək olar", - deyə Cəfərli bildirib.
Onun sözlərinə görə, bu dövr ərzində bazarda dinamik artım baş verib.
2007-ci ilin sentyabrında Dövlət Xidmətində 8,1 min daşınmaz əmlak növü qeydiyyatdan keçib. Bu rəqəmin 3,4 mini ilkin, 4,8 mini isə təkrar bazarın payına düşüb. Cari ilin sentyabr ayında təqribən 10 min daşınmaz əmlak növü qeydiyyata alınıb ki, bu göstəricinin də təqribən 4 mini ilkn, 6 mindən çoxu isə təkrar daşınmaz əmlak bazarının payına düşüb.
Cəfərlinin sözlərinə görə, rəqəmlər orta hesabla 22 faizlik artım - ilkin bazarda 17 faiz, təkrar daşınmaz əmlak bazarında isə 26 faiz artımın olduğunu göstərir.
"Göründüyü kimi, Azərbaycanın daşınmaz əmlak bazarı dünya maliyyə bazarında baş verən hadisələrə baxmayaraq öz fəallığını saxlayır", -deyə Cəfərli bildirib.
Məqalə müəllifi ilə əlaqə ünvanı - [email protected]
