Azərbaycan, Bakı, 19 noyabr/ Trend , müxbir Ü.İsmayılova/ "İsveçrə Dövlət İqtisadi Əlaqələr Katibliyi (SECO) Azərbaycanda əqli mülkiyyət hüquqlarının qorunması layihəsinin davamının maliyyələşdirilməsi imkanlarını nəzərdən keçirir", - SECO - nun Azərbaycanda Milli Proqram rəhbəri Nailə Səfərova çərşənbə günü bildirib.
Dövlət Katibliyinin mövcud layihə üzrə texniki yardımı 300 min dollar təşkil edir. Layihə çərçivəsində, Azərbaycan Dövlət Gömrük Komitəsinin əməkdaşları üçün sərhəddə əqli mülkiyyət hüquqlarının qorunması üzrə treninqlər təşkil edilir. Tədbirdə sərhəddə gömrük prosedurlarında bu halların qarşısının alınması üzrə rəy mübadiləsi aparılıb, pirat məhsullara qarşı strategiya təqdim edilib.
Bu layihənin realizəsi Azərbaycanın Ümumdünya Ticarət Təşkilatına (ÜTT) daxil olması prosesində, daxili və xarici sərmayələrin cəlb olunmasında həlledici rol oynayacaq.
Son illər Azərbaycanda əqli mülkiyyət hüquqlarının qorunması aşağı səviyyədədir ki, bu mülkiyyət növünün hüquqlarının qorunmasının həyata keçirilməsi üzrə hüquqi sistem daxilində ziddyyətlər, əqli mülkiyyət istifadəçiləri, hüquq - mühafizə orqanları və gömrükdə ümumilikdə əqli mülkiyyət hüquqlarının qorunması barədə məhdud anlayışı, bu sahədə ictimai maarifləndirmənin zəif olması bunu təsdiq edir.
SECO - nun layihəsi nəzərdə tutur:
- çatışmazlıqları müəyyənləşdirmək və mövcud qanunlara düzəlişlər etmək məqsədilə mövcud qanunvericiliyi qısaca təhlil etmək;
- müvafiq agentliklərdə trener kimi fəaliyyət göstərəcək bir sıra ixtisaslı mütəxəssislər üçün əqli mülkiyyət sahəsində, gömrükdə əqli mülkiyyətin hüquqlarının həyata keçirilməsi üzrə ixtisaslaşdırılmış təlim kursları keçmək;
- əqli mülkiyyət sahəsində mübahisələrinin həll olunması üzrə əsas təlim kursu təşkil etmək;
- əqli mülkiyyət hüquqlarının qorunması sahəsində ictimai maarifləndirməni institutlaşdırmaq üçün Azərbaycan hökümətinə kömək etmək.
SECO İsveçrə Əqli Mülkiyyət İnstitutunu layihənin icraçı agenti kimi təyin edib. Layihənin Cənubi Qafqaz və Azərbaycan üzrə yerli koordinatoru İsveçrə Əməkdaşlıq Ofisidir.
Müəlliflə əlaqə saxlamaq üçün elektron ünvan: [email protected]
