Azərbaycan, Bakı, 11 dekabr/ Trend , müxbir İ.Xəlilova/ Azərbaycan prezidenti İlham Əliyevin sərəncamı ilə "2009-cu ildə yaşayış minimumu haqqında" və "2009-cu ildə ehtiyac meyarının həddi haqqında" qanunlar təsdiqlənib.
Gələn ildən ünvanlı sosial yardım alanlar üçün ehtiyac meyarını 55 manatdan 60 manatadək artırmaq planlaşdırılır. Bununla yanaşı, bu yardımı alanların siyahısının 190 min ailəyədək genişlənəcəyi gözlənilir. 2008-ci ilin sonuna onların sayı 160 min ailəyə çatdırılacaq. 2006-cı ildə isə bu proses başlayarkən siyahıda 40 min ailə olub.
Nazirlər Kabinetinin qərarı ilə, 2006-cı il iyulun 1-dən verilən dövlət ünvanlı sosial yardımının alınması üçün "ehtiyac meyarı" həddi ilk əvvəl 30 manat məbləğində müəyyən edilmişdi.
2009-cu ildən yaşayış minimumu 70 manatdan 84 manatadək artacaq. Bununla yanaşı, əmək qabiliyyətli əhali üçün bu hədd 92 manat, pensiyaçılar üçün 65 manat, uşaqlar üçün 69 manat səviyyəsində təşkil edəcək.
Bu qanunlar 2009-cu il yanvarın 1-dən qüvvəyə minir.
Dekabrın 11-nə olan cari mübadilə məzənnəsi - 0,8068 AZN/USD
Müəlliflə əlaqə saxlamaq üçün elektron ünvan: [email protected]
