Ukrayna, Kiyev, 15 dekabr/ Trend , müxbir Z.Novosvitski/ Macarıstanda dəmiryolçuların tətilinə görə Ukrayna - Macarıstan sərhədindən qatarlar buraxılmır.
Ukrayna Dövlət Sərhəd Xidmətinin KİV və İctimaiyyətlə Əlaqələr Şöbəsindən bildiriblər ki, dekabrın 14-də Macarıstanla dəmir yolu əlaqəsi müvəqqəti kəsilib. Yük qatarları, həmçinin, Çop-Zaxon, Zaxon - Çop və Budapeşt - Moskva, Moskva - Budapeşt sərnişin qatarları sərhədi keçə bilməyib.
Macarıstanın sərhəd polisi Ukrayna Dövlət Sərhəd Xidmətinin müraciətinə cavab olaraq izah edib ki, hadisəyə macar dəmiryolçularının dekabrın 15-də başlayan tətili səbəb olub. Tətilin nə vaxt başa çatacağı məlum deyil.
Ukrayna Dövlət Sərhəd Xidməti dəmir yolu nəqliyyatı ilə sərhədi keçməyi planlaşdıran vətəndaşlara bu məlumatı nəzərə almağı və mümkün olduqca marşrutlarına düzəlişlər etməyi tövsiyə edir.
Müəlliflə əlaqə saxlamaq üçün elektron ünvan: [email protected]