Azərbaycan, Bakı, 15 dekabr/ Trend , müxbir İ.Xəlilova/ Avropa Yenidənqurma və İnkişaf Bankı (AYİB) və Beynəlxalq Maliyyə Korporasiyası (BMK) Azərbaycanda aqrar sektorun inkişafında maraqlıdırlar və bununla əlaqədar olaraq, ölkə hökuməti ilə birgə daha münasib əməkdaşlıq formasını axtarırlar, - Agrarcredit bank olmayan kredit təşkilatının İdarə Heyətinin sədri Məmməd Musayev bildirib.
"Bu institutlar Maliyyə Nazirliyi və Azərbaycan Mili Bankı ilə Agrarcredit-in bazasında yaradılan kənd təsərrüfatı bankının səhmdarlığına daxil olmaq istiqamətində də danışıqlar aparır", - Musayev deyib.
Onun sözlərinə görə, dünya böhranı ilə əlaqədar, danışıqlar müvəqqəti dayandırılıb. AYİB-in Bakı nümayəndəliyinin rəhbəri Frensis Deleyin əvvəllər bəyan etdiyinə görə, Avropa Bankı Azərbaycanda kənd təsərrüfatı bankının səhmdarlığına daxil olmaq planlarına yenidən baxmaq niyyətindədir.
"AYİB, digər maliyyə təsisatları ilə bərabər səviyyədə Agrarcredit bank olmayan kredit təşkilatının restrukturizasiyası və özəlləşdirilməsinə kömək etməyi istəyib, - Deley deyib. - AYİB hökumətlə ən kiçik payla strateji tərəfdaşla birgə iştiraka dair ilkin danışıqlar aparıb. Lakin cari maliyyə böhranı şəraitində yaxın gələcəkdə xarici sərmayədarın layihədə iştirakı qeyri - mümkün görünür və bu o deməkdir ki, Agrarcredit-ə dair planlara yenidən baxılmalıdır".
Hələ yayda AYIB-in "Aqrar-kredit"in bazasında yaradılan kənd təsərrüfatı bankında 25+1 faiz səhm paketinin alınmasına razı olması bəyan edilib.
Beynəlxalq Maliyyə Korporasiyası (BMK) və Alman Inkişaf Bankı KfW kənd təsərrüfatı bankı da yaradılmasında iştiraka maraq göstərir. Bu maliyyə institutları ilə məsləhətləşmələr davam etdirilir və onlaraın hər birinə 10-15 faiz səhm təklif edilə bilər, - kredit təşkilatından bildiriblər.
Hökumət 2009-cu ildə onun statusunu dəyişməyi planlaşdırır.
Kredit təşkilatı hazırda məhdud lisenziya əsasında fəaliyyət göstərir. Digər dövlət bankları - Azərbaycan Beynəlxalq Bankı və Kapital Bank ilə (iyunda onun özəlləşdirilməsi başa çatıb) olduğu kimi, hökumət "Aqrar-kredit"in dövlətsizləşdirilməsinə başlayanadək, onun kapitallaşdırılmasını davam etdirəcək. Kredit təşkilatının kapitalının artırılması üçün 2008-ci ilin dövlət büdcəsində 1 mln. manat vəsait nəzərdə tutulub. "Aqrar-kredit" cari ilin yekunları üzrə bu vəsaiti dividendlər qismində dövlət xəzinəsinə qaytarmağı planlaşdırır.
Dövlətin 2007-ci ilin dövlət büdcəsi vəsaitləri hesabına 6,3 mln. manat ödəməsindən sonra hazırda kredit təşkilatının kapital 18,6 mln. manat səviyyəsində formalaşıb.
"Aqrar-kredit"in əsas səhmdarı kredit təşkilatının 99,9 faiz səhmlərinə malik olan Azərbaycan Maliyyə Nazirliyidir. Qalan səhmlər isə "Azərsığorta" Dövlət Sığorta Şirkəti və "Meliorasiya və Su Təsərrüfatı" ASC arasında bərabər paylanıb.
Dekabrın 15-nə olan cari mübadilə məzənnəsi -- 0,805 AZN/USD.
Müəlliflə əlaqə saxlamaq üçün elektron ünvan: [email protected]
