Azərbaycan, Bakı, 03 fevral/ Trend , müxbir Ü.İsmayılova/ Azərbaycan Siğortaçılar Assoasiyası (ASA) böhran əleyhinə tədbirlər çərçivəsində üzvlük haqlarının məbləğini 20 faiz azaltmaq niyyətindədir, - Assosiasiyanın və MBASK sığorta şirkətinin İdarə Heyətinin sədri Cəmil Məlikov çərşənbə axşamı bildirib.
"Üzvlük haqlarını hazırki beş min manatdan dörd min manatadək azaltmaq təklif olunur", - Məlikov deyib.
Onun sözlərinə görə, üzvlük haqlarının azaldılması məsələsi Assosiasiyanın fevralın 19-da keçiriləcək ümumi toplantısında nəzərdən keçiriləcək. Toplantıda 2009-cu il üçün fəaliyyət planı da müzakirə olunacaq.
Assosiasiyanın 2009-cu il üçün fəaliyyət planına qanunvericilik üzrə sığorta şirkətlərinin top-menecmenti və sığorta sahəsinin əməkdaşları üçün treninqlərin təşkili; ASA-nın təhsil komitəsinin işinin təşkili; ASA komitələrinin iclaslarının hazırlanması və təşkilati-texniki təminatı; sığorta bilikləri üzrə İnternet-portalın işə salınması; sığorta üzrə elektron kitabxananın yaradılması (ədəbiyyatın Azərbaycan dilinə tərcüməsi); ASA-nın büdcəsinin hazırlanması, təsdiq edilməsi və icrası daxildir. Üzvlük haqlarının daxil olmasına nəzarət, ASA üzvlərinə qurumun fəaliyyət istiqamətləri üzrə informasiya və digər materialların göndərilməsi də ASA-nın 2009-cu ildə iş planına daxildir.
2009-cu ildə sığorta sahəsində problemlərin aşkar edilməsi məqsədilə sorğular və sığorta təşkilatları ilə ASA-ya üzvlük, digər QHT ilə birgə əməkdaşlıq məsələləri üzrə iş aparılacaq. Assosiasiyanın vəzifəsinə xarici ölkələrin sığortaçıları, onların milli və beynəlxalq birlikləri ilə münasibətlər, işgüzar əlaqələrin inkişaf etdirilməsi, informasiya təsiri, Rusiya, Ukraynanın sığorta assosiasiyaları ilə və Almaniya Sığortaçılar Assosiasiyası ilə birgə layihələrin həyata keçirilməsi daxildir.
2009-cu ildə həmçinin II Azərbaycan Beynəlxalq Sığorta Forumu keçiriləcək.
I Azərbaycan Beynəlxalq Sığorta Forumu iyulda Bakıda keçirilib. Bu tədbir Azərbaycanın sığorta bazarının inkişaf tendensiyalarına, Avropa ölkələrinin sığorta bazarının təcrübəsinin Azərbaycanda sığorta sektorunun inkişafına təsir etməsinə, həyat sığortasının inkişafına, Azərbaycanın sığorta bazarının ölkənin maliyyə sistemi kimi təhlilinə və sığortada korporativ idarəetməyə həsr edilmişdi.
Azərbaycanın Sığortaçılar Assosiasiyasında "Qala Sigorta" və "Az Re" təkrarsığorta şirkəti istisna olmaqla, fəaliyyət göstərən bütün sığorta şirkətləri təmsil olunub. ASA 2006-cı ilin dekabrında yaradılıb.
Fevralın 3-nə olan cari mübadilə məzənnəsi -- 0,8071 AZN/USD.
Müəlliflə əlaqə saxlamaq üçün elektron ünvan: [email protected]
