Azərbaycan, Bakı, 20 aprel / Trend , müxbir N.İsmayılova /
"Azərbaycan təkcə neft sektoru məhsulları ilə dünya bazarına çıxmamalıdır", - Dünya Bankının (DB) Azərbaycan nümayəndəliyinin rəhbəri Qreqori Yedjeçak "Neft iqtisadiyyatı olan ölkələrdə maliyyə böhranı təhlükəsi" adlı konfrans zamanı deyib.
"Mərkəzi bankın ağıllı və düzgün siyasəti nəticəsində Azərbaycan maliyyə böhranının birinci dalğasının öhdəsindən gələ bildi. Azərbaycan indi dünya bazarına qeyri-neft sektoru məhsullarını da çıxartmalıdır. Belə olduqda ölkədə neft məhsulları ehtiyatları azaldığı zaman Azərbaycan iqtisadiyyatı buna hazır olar", - Yedjeçak qeyd edib.
Azərbaycanlı deputat Əli Mənsimlinin sözlərinə əsasən, xarici investisiyaların azlığı, Azərbaycanın dünya ictimaiyyətinə zəif inteqrasiyası ölkəni Rusiya və Qazaxıstandan fərqli olaraq maliyyə böhranının mənfi təsirindən qoruya bildi.
Katon İnstitutunun eksperti Andrey İllarionovun fikrincə, böhran bir sıra dünya ölkələri iqtisadiyyatının zəifləməsinə səbəb olsa da, bəzi ölkələr iqtisadi artımın müsbət tendensiyalarını qoruya bildilər və bu ölkələrə Azərbaycan, Çin, Hindistan, Latın Amerikası və Yaxın Şərq ölkələri aiddir.
"Böhran şəraitində müxtəlif ölkələr müxtəlif cür davrandığından maliyyə böhranının təsiri onlara eyni dərəcədə olmur", - İllarionov deyib.
Məqalə müəllifi ilə əlaqə ünvanı: [email protected]
