Azərbaycan, Bakı, 26 may / Trend , müxbir E.İsmayılov /
"Azərbaycan Respublikası Dövlət Neft Fondu (ARDNF) hələ ki, bu il Bakı-Tbilisi-Qars layihəsinin Gürcüstan hissəsinin maliyyələşdirilməsi üçün böyük vəsait ayırmayıb", - ARDNF-in icraçı direktoru Şahmar Mövsümov deyib.
Onun sözlərinə görə, böyük ayırmalar həyata keçirilməyib. Yalnız "qurumun saxlanılması, həmçinin layihə işləri üçün kiçik vəsaitlər ayrılıb", - Mövsümov bildirib.
ARDNF-in bu addımına səbəb Gürcüstan ərazisindəki genişmiqyaslı işlərin başlamamasıdır. Burada hələ layihələndirmə işləri aparılır.
Mövsümov deyib ki, bu il layihə çərçivəsində ARDNF 100 milyon manat (təxminən 80 milyon dollar) ayırmağı planlaşdırır.
Xəttin Gürcüstan hissəsinin tikintisi üçün Azərbaycan ARDNF vasitəsilə Gürcüstanın "Marabda-Kartsaxi dəmiryolu" MMC-yə 25 il müddətinə 1 faizlə 200 mln. dollar həcmində güzəştli kredit ayırmağı planlaşdırır. Bu müəssisəyə həmçinin maaş ödənilməsi və karguzarlıq xərcləri üçün 280 min dollar veriləcək.
20,7 milyon manat həcmində ilk tranş 2007-ci ildə təqdim olunub. 2008-ci ildə ARDNF Bakı-Tbilisi-Qars dəmiryolunun tikintisi layihəsinə 5,3 milyon manat ayırıb.
Bakı-Tbilisi-Qars layihəsi çərçivəsində dəmiryol magistralının yeni 105 km-lik qolunun tikintisi planlaşdırılır. Bunun 76 km-i Turkiyə ərazisindən, 29 km-i Gürcüstan ərazisindən keçəcək. Bundan əlavə nəql gücünü ildə 15 mln. ton yükə çatdırmaq üçün Gürcüstanda 183 km-lik Axalkalaki-Marabda-Tbilisi dəmiryolunun 183 km-lik hissəsi yenidən qurulacaq. Axalkalakidə Gürcüstanda mövcud olan dəmiryol xətlərinin Avropa standartlarına uyğunlaşdırılması üzrə məntəqələrin tikilməsi də planlaşdırılır.
Məqalə müəllifi ilə əlaqə ünvanı: [email protected]