Azərbaycan, Bakı, 02 iyun / Trend , müxbir E. İsmayılov /
Boeing şirkəti yeni Boeing 787-8 Dreamliner təyyarəsinin hazırlanması layihəsinin həyata keçirilməsini gecikdirir, bu isə hava gəmilərinin bir il sonra gətirilmə tarixinin ertələnməsinə səbəb olur. Bu barədə çərşənbə axşamı AZAL QSC-nin (milli aviaşirkət) prezidenti Cahangir Əskərov bildirib. Müqavilənin bağlanması çərçivəsində iki Boeing 787-8 təyyarəsinin 2014-cü ilə kimi Azərbaycana gətirilməsi nəzərdə tutulmuşdu. Gətirilmənin tarixindəki dəyişikliyə baxmayaraq, Azərbaycan MDB dövlətləri arasında bu hava gəmilərini alacaq birinci ölkə olaraq qalmaqdadır.
Ötən ilin avqust ayında AZAL və Boeing arasında iki "Boeing-767-300 ER" təyyarəsinin alınması barədə müqavilə imzalanıb. Təyyarələrdən birincisinin növbəti ilin yayın əvvəllərində, ikincisinin isə 2011-ci ilin yaz fəslində alınması nəzərdə tutulub. Milli aviaşirkət həmçinin bu müqaviləyə əsasən növbəti ildə iki "Boeing-737-900 ER" təyyarəsini və 2011-ci ildə daha ikisini alacaq. Nəhayət, 2010-2014-cü illərdə AZAL MDB ölkələri arasında birinci olaraq iki "Boeing-787-8" təyyarəsi alacaq.
Hava gəmilərinin alınması "Azərbaycan Hava Yolları" aviaşirkətinə Avropa, Cənub-Şərqi Asiya və Amerikaya yeni marşrut açmağa imkan yaradacaq. Bu təyyarələrin gətirilməsi üzrə maliyyələşdirməni uzunmüddətli kreditlər hesabına aparıcı dünya bankları həyata keçirəcək.
Boeing 787-8 Dreamliner və Boeing 787-9 Dreamliner modifikasiyası müvafiq olaraq 15700 km və 15400 km uzunluqda marşrut üzrə üç klass salonda 223-259 sərnişin daşımaq gücünə malikdir. Yeni laynerin daha bir modifikasiyası Boeing 787-3 Dreamliner 6500 km məsafəyə kimi iki klass salonda 296 sərnişin daşınması üçün nəzərdə tutulub.
Məqalə müəllifi ilə əlaqə ünvanı: [email protected]