Azərbaycan, Bakı, 22 iyun / Trend , müxbir N.İsmayılova /
Azərbaycan Mərkəzi Bankı (MB) tərəfindən kreditləşmə üzərinə qoyulan faizlərin azaldılması Mugan Bank-ın fəaliyyətinə təsir edib. Bu barədə bankın idarə heyətinin sədri Elmir Həsənov bildirib.
"Mərkəzi Bank tərəfindən uçot qoyuluşunun azaldılmasından sonra bizim bankda kreditləşmə üzərinə qoyuluşlar 24-26 faizə endirilib", - Həsənov bildirib.
Onun sözlərinə görə, əvvəllər bank tərəfindən verilən kreditlərə orta faiz qoyuluşu 26-28 faiz təşkil edirdi.
"Hazırda bazarda qeyri-müəyyən vəziyyəti nəzərə alaraq bank kredit və depozit siyasətində cari standartları tətbiq edəcək", - Həsənov deyib.
Deflyasiya proseslərini nəzərə almaqla 2009-cu ildə pul siyasətinə müvafiq olaraq, AMB makro iqtisadi balansı, maliyyə stabilliyi və ölkədə iqtisadi aktivliyin saxlanması məqsədi ilə mayın 25-dən etibarən uçot qoyuluşunu 2 faiz azaldıb.
Mugan Bank-ın kredit portfeli ötən il 49 milyon manatdan 68 milyon manata qədər artaraq 35 faiz artım təşkil edib. Bankda əmanətlərin portfeli ötən ilin əvvəlinə 24 milyon manat təşkil edib və ilin sonuna 40 milyon manata çatdırılıb. Nəticədə əhalinin əmanət qoyuluşları 66,7 faiz artıb.
İyunun 22-nə rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]