Azərbaycan, Bakı, 27 iyul / Trend , müxbir N.İsmayılova /
"Xarici işlər nazirinin müavini Mahmud Məmmədquliyevin rəhbərlik etdiyi Azərbaycan nümayəndə heyəti iyulun 24-də Cenevrədə, Ümumdünya Ticarət Təşkilatına (ÜTT) tamhüquqlu üzvlük barədə çoxtərəfli danışıqların VII mərhələsini keçirib", - Azərbaycan XİN mətbuat xidmətinin məlumatında deyilir.
İclasda XİN, İqtisadi İnkişaf, Ədliyyə, Sənaye və Energetika, Maliyyə, Vergilər, Kənd Təsərrüfatı nazirliklərinin, həmçinin Standartlaşdırma, Metrologiya və Patent üzrə, Gömrük və İşlə Təminat komitələrinin nümayəndələri iştirak edib.
Məmmədquliyevin sözlərinə görə, Azərbaycan artıq ÜTT katibliyi və müvafiq ölkələrə ölkənin iqtisadi maraqlarını özündə əks etdirən ticarət və xidmətlər üzrə təkmilləşdirilmiş təklifləri hazırlayıb və təqdim edib. Bununla yanaşı, milli qanunvericiliyin ÜTT ilə müqavilələrə uyğunluğu sahəsində planlaşdırılan və həyata keçirilən işlər barədə məlumat verilib.
Misir, Türkiyə, Paraqvay, Çin, Braziliya, Pakistan və İordaniyanın nümayəndələri Azərbaycanın ÜTT-yə sərfəli şərtlərlə daxil olmasını dəstəkləyib və ölkənin bu istiqamətdə apardığı işləri müsbət qiymətləndiriblər. O cümlədən ABŞ, Aİ, Kanada, Avstraliya, Cənubi Koreya nümayəndələri Azərbaycanın üzvlüyə daxil olmasını inam prinsipi ilə dəstəkləyiblər.
İclasın yekunlarına əsasən elan edilib ki, Azərbaycanın ticarət rejimi ilə bağlı suallar üzv ölkələr tərəfindən sentyabrın 14-nə qədər təqdim olunmalıdır və işçi qrupunun növbəti iclası bu ilin sonu, yaxud da gələn ilin əvvəlində keçiriləcək.
İyulun 21-22-də, həmçinin Aİ və ABŞ arasında ikitərəfli danışıqlar aparılıb.
İyulun 23-də ABŞ, Kanada, Aİ və Türkiyənin iştirakı ilə kənd təsərrüfatının dəstəklənməsi məsələləri üzrə çoxtərəfli danışıqlar aparılıb. Görüşlər zamanı Azərbaycan təkmilləşdirilmiş ACC/4 rejimi və kənd təsərrüfatına daxili dəstək sahəsinin səviyyə və dəstək həcmini təqdim edib.
Cenevrəyə səfər zamanı Məmmədquliyev Azərbaycanın ÜTT-yə üzv olması məsələsini Dünya Bankı və BMT-nin Ticarət və İnkişaf Konfransı (UNCTAD) ekspertləri ilə müzakirə edib.
Bir müddət əvvəl Azərbaycan Höküməti danışıqları iyunda keçirməyi planlaşdırırdı.
Dekabr görüşündə (VI mərhələ) danışıqlar görülən işlər üzrə hazırlanmış ticarət və xidmətlər üzrə hesabat (factual summary) çərçivəsində keçirilib, ancaq kənd təsərrüfatı üzrə çoxtərəfli danışıqlar ÜTT katibliyinin xahişi ilə ertələnib.
Azərbaycan ÜTT-yə özünə uyğun şərtlər daxilində, öz iqtisadiyyatının gələcək inkişafı və yüksəlməsinə zərər gətirmədən, yəni inkişaf etməkdə olan ölkə statusunda daxil olmaq istəyir.
Azərbaycan 1997-ci ildən Ümumdünya Ticarət Təşkilatında müşahidəçi qismində iştirak edir.
Mərkəzi Asiya regional iqtisadi əməkdaşlıq (CAREC) proqramının qiymətləndirmələrinə görə, proqramın üzv ölkələri 2013-cü ilə qədər ÜTT-yə üzv olacaqlar. Bu günə qədər CAREC-in 8 üzvündən yalnız üçü - Çin, Qırğızıstan və Monqolustan bu təşkilata üzv ola bilib.
Məqalə müəllifi ilə əlaqə ünvanı: [email protected]