Azərbaycan, Bakı, 11 avqust / Trend , müxbir N.İsmayılova /
Azərnəqliyyat Bank iki ay ərzində nizamnamə kapitalını əlavə səhm emissiyası və onların bankın səhmdarları arasında bölüşdürülməsi hesabına 25 milyon manatadək artırmağı planlaşdırır. Bu barədə çərşənbə axşamı bankın idarə heyətinin sədri Emin Məmmədov deyib.
"2009-cu ilin iyulunda nizamnamə kapitalı 10,7 milyon manatdan 15 milyon manatadək artırılıb. İki ay ərzində isə 25 milyon manata çatdırılacaq", - Məmmədov deyib.
Son 10 ay ərzində Azərnəqliyyat Bankda bir sıra dəyişikliklər baş verib. 2008-ci ilin oktyabrında bankın majoritar səhm paketini yeni təsisçilər alıblar. Bunun nəticəsində təşkilatın büün rəhbər heyəti paraktiki olaraq dəyişib.
Azərnəqliyyat Bank 1989-cu ildə ticarət bankı kimi təsis edilib. 2005-ci ildə bankın statusu açıq səhmdar cəmiyyətə dəyişdirilib. Hazırda bankın Bakıda və regionlarda səkkiz filialı fəaliyyət göstərir. Azərnəqliyyat Bankın aktivləri iyulun 1-də 69,72 milyon manat təşkil edib. Müştərək kapitalı 12,72 milyon manatdır. Bankın xalis gəliri iyulun 1-nə 1,07 milyon manat təşkil edib.
Avqustun 11-nə olan cari məzənnə 0,8043 AZN/USD təşkil edir.
Məqalə müəllifi ilə əlaqə ünvanı: [email protected]
