Azərbaycan, Bakı, 18 avqust / Trend , müxbir Ü.İsmayılova /
Azərbaycanda iyulun 1-nə təqaüdçülərin sayı 1,292 milyon nəfər təşkil edib ki, bu da ölkə əhalisinin 15 faizini təşkil edir, çərşənbə axşamı Azərbaycan Dövlət Statistika Komitəsindən bildirilib.
Ümumi sayın 65 faizi yaşa görə, 24 faizi əlliliyə görə, 11 faizi isə ailə başçısının itirilməsinə görə təqaüdə çıxıb.
Hazırda Azərbaycanda aylıq təqaüdün məbləği 2008-ci ilin analoji dövrünə nisbətdə 28 faiz artaraq 99,43 manat təşkil edib ki, bu da ölkədə orta əmək haqqının 33 faizini təşkil edir.
Yanvar-iyunda ölkədə təqaüdlərin maliyyələşdirilməsi üçün Əhalinin Sosial Müdafiəsi Fondunun büdcəsindən 801,5 milyon manat ayrılıb, il ərzində artım 198,5 milyon manat və ya 33 faiz təşkil edib. Bu vəsaitlərin 778,7 milyon manatı təqaüd, 22,8 milyon manatı yardım qismində verilib. 8,5 milyon manat uşaqların doğulması, 7,2 milyon manat əmək qabiliyyətinin itirilməsi, 4,3 milyon manat dəfn xərcləri üçün, 2,8 milyon manat digər yardımlar üçün ödənilib.
Sosial Fondun məlumatlarına əsasən, birinci yarımildə 287,3 min nəfər ümumilikdə 9,89 milyon manat yardım alıb. 18 min nəfər yaşa görə, 91,3 min nəfər əlliliyə görə, 31 min nəfər ailə başçısının itirilməsinə görə yardım alıb. Əmək qabilliyyətinin olmaması səbəbindən yardım alan 18 yaşına kimi uşaqların sayı 57 min nəfər təşkil edib.
Bu dövr ərzində ölkədə 131,9 min ailə və ya 595,7 min nəfər ünvanlı sosial yardım alıb. Onların 311,2 min nəfəri qadın, 282,3 min nəfəri uşaqdır. Ünvanlı sosial yardımın bir nəfər üçün orta aylıq məbləği 20,03 manat təşkil edir.
Məqalə müəllifi ilə əlaqə ünvanı: [email protected]
