Azərbaycan, Bakı, 16 oktyabr / Trend , müxbir İ Xəlilova/
Azərbaycan Mərkəzi Bankının (AMB) İdarə Heyətinin qərarı ilə daha dörd kredit təşkilatının - Beyləqan rayonunda "Lider", paytaxtda "Qarant", Füzuli rayonunda "Traser" və Gədəbəy rayonunda yerləşən "Gədəbəy" qeyri-bank kredit təşkilatlarının fəaliyyət lisenziyaları ləğv olunub.
"Lider" kredit təşkilatı tərəfindən (lisenziya 31 oktyabr 2003-cü ildə verilib) iki hesabat dövrü ərzində AMB-na hesabatın təqdim olunmaması, illik audit yoxlamasının keçirilməməsi, həmçinin dəfələrlə olunan xəbərdarlığa baxmayaraq daima iqtisadi tənzimləmə normativlərinin pozulması bu təşkilatın lisenziyasının ləğv olunmasına səbəb olub. Qalan üç təşkilat da normativlərə əməl etməyib və illik audit yoxlamaları keçirmədiklərinə görə fəaliyyət lisenziyaları ləğv olunub.
Kredit təşkilatlarına ləğvetmə komissiyaları yaratmaq və ləğvetmə ilə bağlı işləri həyata keçirmək tapşırılıb.
"Kredit təşkilatları haqqında" qanuna əsasən, bu qeyri-bank kredit təşkilatlarının 11 nəfər üzvü olur və onlar öz üzvlərinin maliyyələşdirməsi ilə kredit əməliyyatları həyata keçirirlər. Banklar kimi bu təşkilatlar da Mərkəzi Banka rüblük hesabat verməlidirlər.
Bu dörd kredit təşkilatının bağlanması ilə ölkədə fəaliyyət göstərən qeyri-bank kredit təşkilatlarının sayı 92-dək azalıb, onların 73-ü kredit təşkilatı, 18-i humanitar təşkilatlatlar tərəfindən maliyyələşdirilən təşkilatdır. Bu il altı kredit təşkilatına lisenziya verilib, bir o qədər də təşkilatın lisenziyası ləğv olunub.
Məqalə müəllifi ilə əlaqə ünvanı: [email protected]
