Azərbaycan, Bakı, 14 dekabr / Trend , müxbir Ü.İsmayılova/
Noyabr ayında Bakıda ilkin mənzillərin bir kvadratmetrinin orta qiyməti 3% azalaraq 928 dollara çatıb. Oktyabr ayında bu göstərici 957 dollar olub. Bu barədə "Əmlak Bazarı İştirakçıları" İctimai Birliyindən bazar ertəsi məlumat verilib.
"Yeni tikililərin əksəriyyətində qiymətlər ucuzlaşıb. Ucuzlaşmanın əsas səbəbi tələbatın kəskin azalmasıdır", - birlikdən deyilib.
Oktyabr ayı ilə müqayisədə təkcə Bakının Nizami rayonunda 0,3%-lik bahalaşma müşahidə edilib. Ən əhəmiyyətli azalma isə Bakının Xətai rayonunda qeydə alınıb - 10,8%.
Monitorinqlərin yekununa əsasən, noyabr ayında Bakının ilkin mənzil bazarında qeydə alınan qiymətlər 2007-ci ilin göstəricilərindən aşağı olub.
Bakının təklif olunan ilkin mənzilinin orta sahəsi 122,2 kvadratmetr, orta blok göstəricisi - 2, 4, mərtəbələrin orta göstəricisi isə 15, 16 təşkil edib.
Noyabr ayında Bakının ilkin bazarında 443 yaşayış binasının tikintisi davam edib. Oktyabr ayında bu göstərici 453 olub. Bu dövr ərzində 11 binanın tikintisi başa çatıb və onlar istismara verilib. Binalar 159 inşaat şirkəti tərəfindən tikilib.
Yeni tikililərin əksəriyyəti keçən ayda olduğu kimi Bakının Yasamal rayonunda inşa edilib. Aktivlik üzrə 2-ci və 3-cü yeri isə Xətai və Nəsimi rayonları tutur. Bütün bu rayonlar Bakının ilkin mənzil bazarının ümumi portfelinin 63,6%-ni təşkil edir.
Məqalə müəllifi ilə əlaqə ünvanı: [email protected]