Azərbaycan, Bakı, 11 yanvar / Trend , müxbir N.İsmayılova/
Azərbaycan Mərkəzi Bankının 2009-cu ilin yekunu üzrə valyuta ehtiyatları 961,4 milyon dollar və ya 15,7% azalaraq 5175,6 milyon dollar təşkil edib. Bu barədə Mərkəzi Bankın məlumatında deyilir. 2008-ci ilin sonuna bankın valyuta ehtiyatları 6137 milyon dollar təşkil edib.
2009-cu il ərzində Azərbaycan Mərkəzi Bankı onun sərəncamında olan valyuta ehtiyatlarının idarəciliyindən təxminən 50 milyon dollar məbləğində gəlir gözləyir. Mərkəzi Bankın ilin birinci yarısındakı gəlirləri 23 milyon dollar təşkil edib.
Noyabr ayı ilə müqayisədə dekabr ayında AMB-nin valyuta ehtiyatlarının səviyyəsi 0,1% azalıb. Bu, noyabrın 30-da 5181,1 milyon dollar təşkil etmişdi.
Azərbaycan Respublikası Dövlət Neft Fondunun 15 milyard dollara çatan aktivləri hesaba alınmaqla, ölkənin strateji valyuta ehtiyatı artıq 20 milyard dolları keçir.