Azərbaycan, Bakı, 18 fevral / Trend , müxbir E.İsmayılov/
Bakı Metropoliteni avtomatlaşdırılmış idarəetmə sistemi əsasında 3-cü xətt yaratmağı planlaşdırır. Bunu Bakı Metropoliteninin rəhbəri Tağı Əhmədov cümə axşamı deyib.
"Çünki üçüncü xəttin inkişafı tamamilə yeni formada təşkil ediləcək. İstəyirik ki, gələcəkdə bu istiqamətdə maşinist yox, avtomatik idarəetmə sistemi işləsin", - Əhmədov deyib.
Onun sözlərinə görə, avtomatik idarəetmə sistemi zamanı stansiya və yollar başqa formada təşkil ediləcək, həmçinin yeni vaqonlar da lazımdır.
Buna görə də hələlik bu il 10 yeni vaqonun alınması barədə qəti qərar yoxdur. "Bu il 10 vaqonun əldə edilməsi nəzərdə tutulur, lakin onların alınıb-alınmayacağı barədə dəqiq məlumat yoxdur. Bunlar xarici vaqonlar olacaq. Vaqonlar Rusiyadan alınacaq", - Əhmədov deyib.
Əhmədov deyib ki, köhnə tipli vaqonlar 3-cü xətdə getməyəcəklər, sərnişinlər isə yeni istiqamətə keçmək üçün qatar dəyişəcəklər.
Hazırda Bakı Metropoliteni 3-cü xətt çərçivəsində 2 yeni stansiyanın inşasına başlayıb. Bir stansiyadan başqasına keçmək üçün "Memar Əcəmi" stansiyasından "Cavadxan" stansiyasına keçmək lazım gələcək.
Keçən il Bakı Metropoliteni "Metrovaqonmaş" ASC istehsalı olan 15 vaqon əldə edib. Metropoliten 2008-ci ildə 35, 2007-ci ildə isə 25 vaqon alıb.
"Metrovaqonmaş" zavodu artıq 30 ildən çoxdur ki, Bakı metropolitenini hər növ dəmiryol nəqliyyatı vasitələri ilə təchiz edir. Moskvaətrafı müəssisələrdə istehsal olunan vaqonlar onun parkının təxminən 80 faizini təşkil edir. Bakı metropoliteni 1967-ci ildən fəaliyyət göstərir.
