Azərbaycan, Bakı, 24 fevral / Trend , müxbir N.İsmayılova/
Beynəlxalq Valyuta Fondu (BVF) iqtisadiyyatın diversifikasiyası və qeyri-neft sektorunun inkişafı prosesinin sürətləndirilməsinə dair Azərbaycan hökumətinə tövsiyə verib. Bu barədə BVF-in Azərbaycan üzrə missiyasının rəhbəri Ninke Omes çərşənbə günü Bakıda Azərbaycan-Amerika Ticarət-Sənaye Palatasının (AMCHAM ) üzvləri üçün təqdimat zamanı deyib.
"2009-cu ilin yekunlarına görə Azərbaycan iqtisadiyyatı bütün dünyada yüksək ÜDM artımı olan iqtisadiyyatlardan biri olub, lakin buna baxmayaraq, 2008-ci ildə ölkənin qeyri-neft sektorunun artımı 16 faiz təşkil etdiyi halda, 2009-cu ildə bu göstərici üç faiz olub", - Omes deyib.
Onun sözlərinə görə, Azərbayan hökuməti qeyri-neft sektorunun inkişaf etməsi üçün bir çox tədbirlər görür, lakin bütün bunlar azdır və BVF bu proqramın daha da artırılmasını tövsiyə edir.
"Bizim tövsiyələrimizə struktur islahatlarının sürətləndirilməsi, biznes mühitinin, dövlət xərcləri sisteminin yaxşılaşdırılması və irihəcmli investisiyaların cəlb edilməsi aiddir", - Omes deyib.
BVF-in tövsiyələrinə aşağı səviyyədə olan vergi tariflərinin azaldılması daxil deyil, lakin. onun fikrincə, qeyri-neft sektorunun inkişafının iki yolu var.
"Bu vergi administrasiyasının təkmilləşdirilməsi və kölgə iqtisadiyyatının payının azaldılması, həmçinin dövlət xərclərinin effektivliyinin yaxşılaşdırılmasıdır", - Omes deyib.
