Azərbaycan, Bakı, 18 mart / Trend , müxbir N.İsmayılova/
Azərbaycan Milli Bankı (AMB) strateji müəssisəyə - "Azəralüminium" ASC-yə 61 milyon manat həcmində ikinci tranşı təqdim edib. Bu barədə AMB İdarə Heyəti sədrinin müavini Alim Quliyev məlumat verib. AMB-in alüminium zavodu üçün kreditinin ümumi həcmi 202 milyon manat təşkil edir. İlk tranş 141 milyon manat təşkil edib.
Kredit dövlət zəmanəti ilə 10 il müddətinə illik 3 faiz dərəcə ilə verilib. Vəsait müəssisənin banklar və xarici tərəfdaşlar qarşısında götürdüyü öhdəliklərin yerinə yetirilməsinə, ikinci mərhələdə isə alüminium sənayesinin inkişafı üzrə tədbirlərə yönələcək.
Öz tarixində ilk dəfə olaraq Mərkəzi Bankın strateji müəssisəyə 750 milyon manat məbləğində birbaşa krediti ARDNŞ-yə (Azərbaycan Respublikası Dövlət Neft Şirkəti) 7 il müddətinə illik 2 faiz dərəcə ilə ayrılıb.
"Hazırda Mərkəzi Bank üçüncü kredit xəttinin verilməsi imkanlarını nəzərdən keçirmir. Lakin biz, şübhəsiz ki, bundan sonra da ölkənin strateji baxımdan mühüm müəssisəsini dəstəkləməyə hazırıq", - Quliyev deyib.
Martın 18-nə rəsmi məzənnə 0,8033 AZN/USD təşkil edir.