Azərbaycan, Bakı, 26 aprel /Trend, müxbir İ.Xəlilova/
Asiya İnkişaf Bankı (AİB) aprelin 28-də Azərbaycanın beş bankı ilə ticari maliyyələşdirilmənin genişləndirilməsi haqqında saziş imzalayıb. Bu barədə bazar ertəsi AİB-in Bakı nümayəndəliyindən məlumat verilib. Sazişin imzalanması üçün AİB-in özəl sektor üzrə departamentində investisiyalarla bağlı aparıcı mütəxəssis Stiven Bek Bakıya birgünlük səfərə gəlir.
"Asiya Bankı ticarətin maliyyələşdirilməsinə yardım proqramı (TFFP) çərçivəsində AccessBank, Azəriqazbank, Bank of Baku, DəmirBank və Bank Respublika ilə əməkdaşlığı davam etdirmək niyyətindədir", - nümayəndəlikdən bildirilib.
2006-2008-ci illərdə TFFP çərçivəsində Azərbaycanın dörd bankı - AccessBank, AGBank, Bank of Baku və Bank Respublika ilə saziş imzalanıb və onlar üçün 10 milyon dollar həcmində maliyyələşdirmə açılıb.
Nümayəndəlikdən maliyyələşdirmənin genişləndirilməsinin həcmi barədə açıqlama verilməyib.
Mərkəzi Asiya üçün TFFP-nin genişləndirilməsi imkanlarının müzakirəsi məqsədilə 2009-cu ilin oktyabrında AİB-in özəl sektor üzrə vəzifəli şəxsləri Azərbaycan, Monqolustan və Özbəkistana səfər ediblər.
AİB-in bir milyard dollar məbləğində proqramı inkişaf etməkdə olan ölkələrdə ticarətin dəsətklənməsi məqsədilə üzv ölkələrin beynəlxalq və inkişaf etməkdə olan banklarının maliyyələşdirilməsini təmin edir. İnkişaf etməkdə olan ölkələrdə şirkətlərin ixracın inkişafına lazım olan kredit resurslarına çıxışı uzun müddət çətin olduğundan, bu, sənayenin yeni sektorlarının inkişafına, ümumilikdə iqtisadi artıma mane olub.
Səfər zamanı Asiya bankı ticarətin maliyyələşdirilməsi proqramında Azərbaycan bankları arasında iştirakçıların genişləndirilməsi planları barədə məlumat verib.
AİB TFFP-in həyata keçirilməsinə 2004-cü ildə başlayıb, lakin onu indiki həcmə qədər ötən il martın 31-də genişləndirib. TFFP-nin portfelinin uzadılmasının və onun icra müddətinin təxirə salınmasının mümkünlüyü ilə əlaqədar proqram 2013-cü ilin sonunadək ticari maliyyələşdirmənin dəstəklənməsi üzrə 15 milyard dollara qədər vəsaiti təmin edə bilər.
Asiya bankının gözləntilərinə görə, proqramda iştirak edən Asiya və beynəlxalq bankların sayı 2010-cu ildə də artmaqda davam edəcək.