Azərbaycan, Bakı, 24 iyun /Trend, müxbir İ.Xəlilova/
İslam İnkişaf Bankı (İİB) Azərbaycanda islami maliyyələşmənin tətbiqi üçün əsasın hazırlanmasına kömək etməyə hazırdır. Bu barədə cümə axşamı Bakıda bankın Direktorlar Şurasının 35-ci illik toplantısının yekunlarına həsr olunan mətbuat konfransında İİB prezidenti Əhməd Məhəmməd Əli bildirib.
"İBB islami maliyyələşmənin və ya onun elementlərinin tətbiqi üçün bütün maraqlı tərəflərə kömək etməyə hazırdır. Bu, bank tərəfindən seminar, texniki kömək və işçi görüşlərin keçirilməsi vasitəsilə görülür", - bank prezidenti vurğulayıb.
Bankın nümayəndəsi Həni Sünbülün fikrincə, Azərbaycanda İslam bank işinin inkişafı üçün qanunvericilik və tənzimləyici əsası hazırlamaq lazımdır.
Onun sözlərinə görə, islami maliyyələşmə daha sabit sistemə malikdir ki, bu da dünya maliyyə böhranının nəticələrinin qiymətləndirilməsində nümayiş etdirilib.
"Əlbəttə, biz İslam banklarının inkişafında iştirak edirik, lakin belə məsələlər hələ ki Azərbaycan tərəfi ilə müzakirə edilməyib", - Sünbül qeyd edib. - "Belə müraciət Azərbaycan tərəfindən daxil olsa, biz müzakirələrə başlamağa hazırıq".
Azərbaycan Beynəlxalq Bankının idarə heyətinin sədri Cahangir Hacıyevin fikrincə, digər ölkələrdə olduğu kimi, Azərbaycanda da islami maliyyələşmənin mexanizmi tətbiq edilməlidir.