Azərbaycan, Bakı, 14 iyul /Trend, müxbir Ü.İsmayılova/
İyulun 1-nə olan vəziyyətə görə, Azərbaycanda əhalinin iqtisadi fəal hissəsinin sayı 4 337,4 min nəfər təşkil edib. Bu barədə Azərbaycan Dövlət Statistika Komitəsindən bildiriblər. Onlardan 4078,1 min nəfər ölkənin müxtəlif iqtisadi və sosial sahələrində fəaliyyət göstərir.
İyulun 1-nə muzdla işləyən şəxslərin sayı 1336,8 min nəfərdir. Onlardan 849,2 min nəfəri dövlət sektorunda, 468,5 min nəfəri isə özəl sektorda çalışır.
Muzdla işləyənlərin ümumi sayından 19,2 faiz əmtəə istehsalı sahəsində, 2,6 faiz hasilat sənayesində, 5,6 faiz emal sahəsində, 2,2 faiz elektrik enerjisi, qaz və digər sahələrdə, 1,6 faiz su təsərrüfatında, sutəmizləmə sahəsində, 4,5 faiz tikintidə, 2,7 faiz kənd təssərrüfatı və balıqçılıqda çalışır.
Bu dövr ərzində xidmətlər sahəsində 2,6 faiz təhsil sahəsində, 20,2 faiz pərakəndə və topdansatışda, avtomobil və motosikllərin təmirində, 10,2 faiz əhaliyə tibbi və sosial xidmətin göstərilməsində, 5,6 faiz nəqliyyat və anbar təsərrüfatında, 4 faiz istirahət, əyləncə və incəsənətdə, 3,8 faiz dövlət idarəçiliyində, məcburi sosial təminatda, 3,2 faiz peşəkar, elmi-texniki fəaliyyətdə, 1,8 faiz informasiya və rabitədə, 1,5 faiz maliyyə və sığorta xidmətlərində, 1,5 faiz inzibati xidmətlərin göstərilməsində, 1,3 faiz yaşayış evi və ümumi qidanın təşkilində çalışır, 0,9 faiz xidmətlərin və digər sahələrin, 0,6 faiz isə daşınmaz əmlak sahəsinin payına düşür.
İyulun 1-nə rəsmi işsiz statusu alan şəxslərin sayı 40 min nəfər təşkil edib. Onlardan 43,5 faizi qadınlar olub. Azərbaycanda bir vakant yerə beş nəfər düşür. Azərbaycanda işsizlik üzrə müavinətin orta məbləği 153 manatdır.
İyulun 14-nə olan rəsmi məzənnə 0,8037 AZN/USD təşkil edir.