Azərbaycan, Bakı, 28 iyul /Trend, müxbir İ.Xəlilova/
İki-üç il ərzində Azərbaycanda ünvanlı sosial yardımın (ÜSY) məbləğinin müəyyənləşdirilməsi üçün tətbiq edilən ehtiyac kriteriyaları səviyyəsinin Azərbaycan üzrə yaşayış səviyyəsinə çatdırılması planlaşdırılıb. Bu barədə çərşənbə günü Əmək və Əhalinin Sosial Müdafiəsi Nazirliyinin Yoxsulluq problemləri və ÜSY siyasəti şöbəsinin müdiri Natiq Qasımov məlumat verib.
"Bizim proqram üzrə iki-üç il ərzində 2010-cu ildən etibarən 65 manat təşkil edən ÜSY üçün ehtiyac kriteriyalarının səviyyəsinin yaşayış minimumuna çatdırılması (bu il üçün 87 manat məbləğində müəyyənləşib) mümkün olacaq", - Qasımov bildirib.
Yaşayış minimumu əhalinin əmək qabiliyyətli hissəsi üçün 96 manat, təqaüdçülər üçün 68 manat, uşaqlar üçün 72 manat təşkil edir. Ölkədə aparılan siyasət çərçivəsində yaşayış minimumu artmaqda davam edir və gələcəkdə yaşayış minimumu və əməkhaqqı arasında fərq azalacaq.
İlin birinci yarısında ölkədə ÜSY alanların sayı 132 945 ailə təşkil edib (603 074 nəfər). ÜSY-nin bir ailə üçün orta aylıq məbləği 112,98 manat, bir nəfər üçün 24,91 manat təşkil edir. ÜSY alanların ümumi sayından 108 277 nəfər (81,4 faiz) yardımı ilk dəfə alırlar.
Azərbaycan 2006-cı ildən ÜSY sisteminə keçib. Yardımın məbləği 65 manat təşkil edən "ehtiyac amilləri" və ailənin bir üzvünün gəlir məbləği arasındakı fərqlə müəyyənləşir. Ailədə adambaşına bu kriteriyadan aşağı gəliri olan ÜSY alıcısıdır.
İyulun 28-nə olan rəsmi məzənnə 0,8036 AZN/USD təşkil edir.