Azərbaycan, Bakı, 29 iyul /Trend, müxbir E.İsmayılov/
Azərbaycanda bu yaxınlarda yodlaşdırılmış duz istehsalı üzrə yeni zavodu istismara verən "Azərbaycan Duz İstehsalat Birliyi" QSC 30-40 min tona yaxın duzu ixrac edəcək. Bu barədə cümə axşamı Azərbaycan İnvestisya Şirkəti ilə yanaşı, QSC-nin həmtəsisçisi olan "Azersun Holding"in rəhbəri Abdulbari Gözəl deyib.
Onun sözlərinə görə, holdinq Azərbaycan istehsalı olan duzu Gürcüstan, Rusiya və Mərkəzi Asiya bazarlarına çıxarmaq niyyətindədir.
"İstehsal edilən duzun 30-40 min tona yaxını ixrac ediləcək. İlk növbədə, məhsul Gürcüstan, Rusiya və Mərkəzi Asiyanın bəzi ölkələrinə ixrac ediləcək", - Gözəl bildirib.
Masazır gölünün yaxınlığında tikilən zavodun rəsmi açılışı bu il iyulun 21-də olub. Yeddi hektar ərazini tutan istehsal müəssisəsinin sutkalıq emal gücü 300 ton təşkil edir. Zavodun işi tam avtomatlaşdırılıb. Bu layihənin həyata keçirilməsinə yatırılan investisiyanın həcmi 20 milyon mnata yaxındır. Zavodda duz "Azərduz" və "Bizim duz" brendi ilə istehsal edilir.
Ümumi ərazisi 10 kvadratkilometr olan göldəki duz iki vəziyyətdə - laylarda və su məhlulu şəklində mövcuddur. Gölün duz ehtiyatları təxminən 1 milyon 735 min ton qiymətləndirlir.