2011-ci ildə Azərbaycanın vergi qanunvericiliyinə dəyişikliklər edilə bilər

Azərbaycan, Bakı, 29 iyul /Trend, müxbir İ.Xəlilova/

Azərbaycan Vergilər Nazirliyi vergi qanunvericiliyinə dəyişikliklər edilməsini məqsədəuyğun hesab edir. Cümə axşamı vergilər nazirinin müavini Natiq Əmirovun dediyinə görə, qanunvericiliyə uyğun olaraq, gələn il martın 15-dək Vergi Məcəlləsinə dəyişikliklər layihəsi ölkənin Milli Məclisinə təqdim edilməlidir.

"Bu proses hökumətin tapşırığı ilə vergi qanunvericiliyində bəzi dəyişikliklərin yenidən qiymətləndirilməsi ilə bağlı yubanıb. Hazırda biz onların qiymətləndirilməsini və hesablanmasını aparırıq və hesab edirik ki, dəyişikliklərə ehtiyac var, lakin cari ildə bu çətin ki baş tutsun", - nazir müavini qeyd edib.

Vergi Məcəlləsinə dəyişikliklər edilməsi çərçivəsində vergi dərəcəsinin azaldılması, vergi idarəçiliyinin təkmilləşdirilməsi, ƏDV dərəcələrinin fərqləndirilməsi məsələləri nəzərdən keçirilir.

"Gündəlikdə ƏDV dərəcəsinin bir-iki faiz azaldılması durur, lakin bunun məqsəduyğunluğu hesablamalarla əsaslandırılmayıb, odur ki, məsələ hələ ki açıq olaraq qalır", - nazir müavini vurğulayıb.

"Yeni vergiqoymanın müəyyənləşdirilməsi üçün həmişə geniş imkanlar var, belə ki, Azərbaycan iqtisadiyyatının dərinləşməsi ilə vergiqoyma bazası da genişlənir. Azərbaycan regionlarında emaledici sənaye sahələri genişlənir", - Əmirov qeyd edib.

Vergi qanunvericiliyinə son dəyişiklik 2010-cu ilin yazında edilib, lakin növbəti dəyişikliklər 2012-ci ildən tez qüvvəyə minməyəcək.

1 yanvar 2010-cu il tarixindən birbaşa vergilərin bəzi növləri üzrə dərəcələr azalıb. Gəlir vergisi 22 faizdən 20 faizə, muzdlu işçilər üçün gəlir vergisinin maksimal məbləği 35 faizdən 30 faizə, sahibkarlıqla məşğul olan fiziki şəxslər üçün hüquqi şəxs olmadan 35 faizdən 20 faizədək endirilib.

Sadələşdirilmiş vergi sistemində də dəyişikliklər edilib. Əgər 2010-cu ilədək sadələşdirilmiş sistem üzrə vergini rüblük dövriyyəsi 22,5 min manatı ötməyən fiziki və hüquqi şəxslər ödəyirdilərsə, cari ildən sadələşdirilmiş vergiqoyma sisteminə illik dövriyyəsi 150 min manat təşkil edən hüquqi şəxslər və illik dövriyyəsi 90 min manat olan fiziki şəxslər daxil olacaqlar. Fiziki və ya hüquqi şəxslər tərəfindən bu hədd keçildikdə, onlar 10 gün ərzində Vergilər Nazirliyində ƏDV ödəyicisi qismində qeydiyyatdan keçməlidirlər.

2010-cu ildən etibarən ödənişli əsasda fəaliyyət göstərən məktəbəqədər müəssisələrin ƏDV-nin ödənilməsindən azad edilməsi də tətbiq edilib. Vergi qanunvericiliyinin təkmilləşdirilməsi çərçivəsində yenilik hesab-fakturanın elektron formada təqdim edilməsidir. Nəticədə, Azərbaycan Şərqi Avropa və MDB də elektron hesab-faktura tətbiq edən ilk ölkə olub.

2010-cu ildə vergi qanunvericiliyinə ümumilikdə dörd istiqaməti - vergiödəyicilərinin hüquqlarının artırılması və maraqlarının qorunması (19), vergi administrativliyinin (16) və vergi nəzarətinin (7) təkmilləşdirilməsi, eləcə də redaktə xarakterli (4) dəyişikilikləri əhatə edən 46 dəyişiklik edilib.

İyulun 29-na olan rəsmi məzənnə 0,8036 AZN/USD təşkil edir.