Azərbaycan, Bakı, 3 avqust /Trend, müxbir E.İsmayılov/
Azərbaycan və Türkiyə Qars-Naxçıvan dəmir yolunun tikintisi layihəsinin texniki-iqtisadi əsaslandırılmasının (TİƏ) hazırlanması üzrə işlərə başlayıb. Bu barədə çərşənbə axşamı Türkiyənin nəqliyyat naziri Binəli Yıldırım Bakıda keçirilən Bakı-Tbilisi-Qars layihəsinin Əlaqələndirmə Şurasının ikinci iclası çərçivəsində deyib.
Onun sözlərinə görə, layihə üzrə işlərə bu yaxınlarda başlanılıb və onlar başa çatdıqdan sonra, tərəflər onun reallaşdırılması məsələsinin bütün detallarına baxacaqlar.
"Tərəflər bu layihənin reallaşdırılmasına böyük maraq göstərirlər. Dəmir yolunun inşasına Bakı-Tbilisi-Qars marşrutu üzrə dəmir yolu yaradılmasının başa çatmasından sonra başlanıla bilər", - Yıldırım deyib.
Naxçıvan Muxtar Respublikası Ermənistan-Azərbaycan, Dağlıq Qarabağ münaqişəsi ilə əlaqədar blokadadadır. Hazırda NMR ilə yalnız hava, ya da İrandan avtomobil nəqliyyatı vasitəsilə əlaqə saxlamaq mümkündür. Yeni yolun inşası Bakı-Tbilisi-Qars marşrutu üzrə dəmiryol xəttinin açılışı layihəsi çərçivəsində yüklərin respublikaya dəmir yolu vasitəsilə çatdırılmasına imkan verəcək.