Azərbaycan, Bakı, 14 avqust / Trend /
Yanvar-iyul aylarında Azərbaycanın nəqliyyat sektorunda 109,5 milyon ton müxtəlif yüklər daşınıb ki, bu da 2009-cu ilin yanvar-aprel aylarında olduğundan 3,1 faiz çoxdur. Bu barədə Azərbaycan Dövlət Statistika Komitəsi bildirib.
Yanvar-iyul aylarında daşınan yüklərin ümumi həcminin 73,3 faizi özəl sektorun payına düşür. Bu ilin yanvar-iyul aylarında yüklərin ümumi həcminin 49,6 faizi avtomobil nəqliyyatı ilə, 33 faizi boru kəmərləri, 11,6 faizi dəmiryol və 5,8 faizi dəniz nəqliyyatı ilə daşınıb.
Yanvar-iyul aylarında 764,9 milyon sərnişin daşınıb ki, bu da ötən ilin analoji dövr göstəricisindən 3,4 faiz çoxdur. Sərnişinlərin əsas hissəsi (85,6 faiz) avtomobil nəqliyyatı və metro ilə (13,9 faiz) daşınıb.
Dəmiryol nəqliyyatı ilə12,7 milyon ton müxtəlif yüklər daşınıb ki, bu da 2009-cu ilin yanvar-aprelindən 9,5 faiz çoxdur.
Dəniz nəqliyyatı ilə 6,4 milyon ton müxtəlif yüklər daşınıb. Bu, ötən ilin yanvar-iyul ayında olduğundan 14,6 faiz azdır. Daşınan yüklərin bütün həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi yanvar-iyulda 5,7 milyon ton təşkil edib ki, bu da ötən ilin analoji dövründəkindən 27,8 dəfə çoxdur.
Avtomobil nəqliyyatı ilə 54,3 milyon ton yük daşınıb. Bu, ötən ilin yanvar-iyul aylarındakından 6,7 faiz çoxdur. Sərnişindaşımanın həcmi 654,9 milyon adam (artım 7,4 faiz) təşkil edib. Sərnişinin 96,4 faizi avtobuslarla, 3,6 faizi minik avtomobilləri ilə daşınıb.
Metropolitenlə sərnişindaşımanın həcmi 106,5 milyon nəfər təşkil edərək 15,4 faiz azalıb.
Yanvar-iyul aylarında hava nəqliyyatı ilə 553,4 min sərnişin daşınıb. Daşımaların həcminin 22,4 faizi özəl sektorun payına düşüb.
Bu ilin yanvar-iyulunda Avrasiya nəqliyyat dəhlizi ilə Azərbaycan ərazisindən 25 milyon ton yük daşınıb ki, bu da ötən ilin analoji dövr göstəricisindən 7,3 faiz çoxdur. Yanvar-iyul aylarında dəhliz çərçivəsində 99,9 milyon adam daşınıb ki, bu da 2009-cu ilin yanvar-iyul aylarında olduğundan 7,9 faiz çoxdur.
