Azərbaycan, Bakı, 17 avqust /Trend, müxbir N.İsmayılova/
Azərbaycanın Nazirlər Kabineti fiziki və hüquqi şəxslərə "Aqrolizinq" ASC-yə məxsus kənd təsərrüfatı üçün texnika və avadanlıqların lizinqlə satışı qaydalarına əlavə və dəyişikliklər edib. Bu barədə Nazirlər Kabinetinin qərarının mətnində deyilir.
Qərar kənd təsərrüfatı, iqtisadi inkişaf, maliyyə və ədliyyə nazirliklərinin razılaşdırılmış təklifləri ilə əlaqədar qəbul edilib.
Edilən düzəlişlərə görə, "Aqrolizinq" MMC-nin texnika və ya avadanlıqlarının sığorta haqqı da daxil olmaq şərtilə lizinqlə alqı-satqısı zamanı onun dəyəri 40 min manatı ötərsə, alıcı 10 faiz ilkin ödəniş həyata keçirir və yerdə qalan hissəni isə bir ildən sonra doqquz il ərzində ödəyir. Dəyər 40 min manatdan az olarsa, ilkin ödəniş 20 faiz təşkil edir və yerdə qalan hissə bir ildən sonra doqquz il ərzində ödənilir.
Dəyişikliklərə görə, lizinqlə alınan texnika və avadanlığın dəyəri tam ödənildikdən sonra, müqavilənin müddəti bitir və "Aqrolizinq"də texnika və ya texnoloji avadanlıq üzərində istifadəçinin mülkiyyət hüququ müəyyən edilmiş qanunvericilik qaydasında rəsmiləşdirilir.
"Aqrolizinq" ASC Azərbaycan Prezidenti İlham Əliyevin 2004-cü il 23 oktyabr tarixli sərəncamı ilə Kənd Təsərrüfatı Nazirliyinin balansında yaradılıb. Müəssisənin fəaliyyəti aqrar sahənin yaxşılaşdırılması və müxtəlif kənd təsərrüfatı texnikasının əldə edilməsi, yerli torpaq sahiblərinə lizinqə verilməsi yolu ilə ölkədə sahibkarlığa dəstəkdən ibarətdir. Bu gün ASC doqquz regional aqroservis təchizat bazasına və işğal olunmuş ərazilər istisna edilməklə, Azərbaycanın bütün rayonlarında 55 aqroservis filialına malikdir.
Şirkət 2005-ci ildən başlayaraq öz fəaliyyətinin bütün dövrü ərzində fermerləri 9 467 ədəd aqrar texnika, o cümlədən, 990 taxılyığan kombayn, 2 494 traktor, 140 ekskavator, 5 843 ədəd müxtəlif kənd texnikası, 46 ədəd texniki avadanlıq və s. ilə təmin edib.
