Azərbaycan, Bakı, 20 avqust /Trend, müxbir N.İsmayılova/
Azərbaycan Mərkəzi Bankı (AMB) ilin birinci yarısında banklar tərəfindən zərurət yarandıqda öz biznes modellərinin düzəlişinə və kredit risklərinin adekvat səviyyədə saxlanılmasına istiqamətlənən qabaqlayıcı tədbirlərin keçirilməsini davam etdirib. Bu barədə AMB-nin maliyyə sabitliyi üzrə hesabatında deyilir.
İlin birinci yarısı ərzində kreditləşmə 5,2 faiz artaraq 8658,3 milyon manat təşkil edib. Məzənnənin sabitliyi yanvar-iyunda kreditləşmənin milli valyutada 8,5 faiz artmasına, onun kredit portfelinin əsas artım mənbəyinin inkişafına səbəb olub. Nəticədə, kredit portfeli strukturunda dollarlaşmanın potensiallığının qarşısı alınıb, il ərzində milli valyutada verilən kreditlərin payı isə 58,5 faizdən 60,3 faizədək artıb.
Kredit qoyuluşu strukturunda uzunmüddətli kreditlərin payı 1,6 faiz artıb və ilin birinci yarısının sonuna 74,4 faiz (6439,8 milyon manat) olub. Uzunmüddətli kreditlərin artım tempi (7,5 faiz) kredit portfelinin ümumi artımını (5,2 faiz) ötüb.
Kreditlər üzrə ən yüksək artım ötən ilin müvafiq dövrü ilə müqayisədə energetika, qeyri-neft sənayesi, istehsal, mal və xidmətlər, kənd təsərrüfatı, emal sənayesi və məişət təsərrüfatı sahələrində müşahidə olunub.
Kredit risklərinin yenidən qiymətləndirilməsi və portfelin diversifikasiyalaşdırılması fiziki şəxslərə verilən kreditlərə də təsir göstərib. Verilən kreditlərin ümumi həcmində fiziki şəxslərin kreditləşməsi 0,7 faiz artaraq 27,1 faiz təşkil edib. 2010-cu ilin birinci yarısında təsərrüfat subyektlərinə verilən kreditlərin ümumi həcmində sahibkarlıq fəaliyyəti və istehlak kreditləri müvafiq olaraq 9 və 73 faiz təşkil edib. Kreditlərin 13 faizi ipoteka kreditlərinin payına düşür.
Kredit portfelinin keyfiyyəti qənaətbəxş səviyyədə qalıb. Qeyri-standart kreditlər portfelinin ümumi həcmində 6,9 faiz təşkil edib. Bu göstərici ilin əvvəlində 6 faiz olub. Qeyri-işçi kreditləri 0,4 faiz artaraq, portfelin həcminin 7 faizini təşkil edib. İlin birinci yarısında yaradılan ehtiyatlar ümumi həcmin 12 faizini təşkil edir. Yaradılan ehtiyatlar qeyri-işçi kreditləri 2 dəfə, etibarsız kreditləri isə 4,5 dəfə ödəyir.