Azərbaycan, Bakı, 20 avqust /Trend, müxbir N.İsmayılova/
Dünya Bankının Azərbaycan üzrə yeni meneceri Cozef Ouen rəsmi olaraq vəzifələrinin icrasına başlayıb. Bu barədə cümə günü DB-nin Bakı nümayəndəliyindən bildiriblər.
"Ouen artıq Azərbaycanın dövlət strukturları ilə tanışlığa başlayıb; o, Azərbaycan Prezidenti Administrasiyasının İctimai-siyasi məsələlər şöbəsinin rəhbəri Əli Həsənov və iqtisadi inkişaf naziri Şahin Mustafayevlə görüşüb", - nümayəndəlikdən deyiblər.
Görüşün əsas məqsədi dövlət strukturları və onların rəhbərləri ilə tanışlıq olub. Ouen gələcəkdə Azərbaycan Mərkəzi Bankı və Maliyyə Nazirliyinin rəhbərliyi ilə görüşmək niyyətindədir. Gələn həftə o, bankın ölkədəki əsas tərəfdaşları ilə bəzi görüşlər keçirəcək.
Ouen əvvəllər Nikaraquada ölkə üzrə menecer vəzifəsini tutub.
Ölkə üzrə menecerin səlahiyyət müddəti üç ildir, lakin bu müddət dördüncü ilə də uzadıla bilər. DB-nin Azərbaycandakı keçmiş nümayəndəsi Qreqori Yeceyçak bu vəzifəni artıq dördüncü ildir yerinə yetirir və bu müddət avqustda başa çatıb.
