Azərbaycan, Bakı, 14 sentyabr /Trend, müxbir N.İsmayılova/
Hazırda Azərbaycanda orta istehlak inflyasiyası beş faizə yaxın səviyyədədir. Bu barədə çərşənbə axşamı Azərbaycan Mərkəzi Bankının rəhbəri Elman Rüstəmov deyib. Halbuki bundan əvvəl ölkədə ikirəqəmli inflyasiya olub.
"İstehlak qiymətlərinin artması əsasən xarici faktorlarla əlaqədardır", - Rüstəmov hesab edir.
Onun sözlərinə görə, indi Azərbaycan bəzi ərzaq mallarını idxal edir. Onların sırasına ərzaq mallarının ümumi idxalında xüsusi çəkisi 26 faiz olan taxıl da daxildir. Odur ki, dünya bazarlarında taxılın qiymətinin artması Azərbaycanda inflyasiyaya təsir göstərib.
AMB rəhbərinin sözlərinə görə, ölkədə tələbat inflyasiyası müşahidə olunmur.
Mərkəzi Bankın proqnozlarına görə, cari ilin sonunadək orta illik inflyasiya 5-6 faizə yaxın olacaq.
Dövlət Statistika Komitəsinin məlumatlarına görə, avqustda Azərbaycanda istehlak mallarının qiymətləri və xidmət tarifləri ötən aylarla müqayisədə 0,7 faiz artıb.
Ay ərzində ərzaq mallarının qiyməti bir faiz, əhaliyə göstərilən ödənişli xidmətlərin tarifləri və qeyri-ərzaq mallarının qiymətləri 0,2 faiz artıb.
Ötən ay buğda çörəyi, makaron məmulatları, pendir, yumurta, şit yağ, bitki yağı, kefir, mal əti, banan, limon, şabalıd, kələm, çuğundur, kök, kartof, pomidor, xiyar kimi məhsulların qiyməti artıb.
Ay ərzində toyuq məhsulları, təzə balıq, pasterilizə edilməmiş süd, smetan, alma, armud, qarpız və balqabaq, üzüm, badımcan, soğan kimi ərzaq mallarının qiymətində azalma müşahidə olunub. Avqustda qeyri-ərzaq malları arasında qiymətlər geyim və ayaqqabıda azalıb, tikinti mallarının qiyməti isə artıb.
Avqustda əhaliyə göstərilən ödənişli xidmətlərdən MDB ölkələrinə hava və dəmiryolla sərnişin daşımalarının tarifləri bahalaşıb.
2010-cu ildə ölkənin taxıl məhsullarına olan tələbatını ödəmək üçün taxılın idxal həcminin artırılması planlaşdırılır. Qazaxıstandan bir milyon ton taxılın gətirilməsi nəzərdə tutulub.
Taxıl idxalının artmasına zərurət respublikanın Aran zonasında təbii fəlakət nəticəsində əkin sahələrinin məhv edilməsi nəticəsində yaranıb. Əkin sahələrinin 110 min hektarı su altında qalıb. Bu səbəbdən cari ildə Azərbaycanda təxminən iki milyon ton taxıl yığılacaq. Bunlardan ərzaq taxılının payına 1,3 milyon ton düşür. 2009-cu ildə üç milyon ton - rekord məhsul yığılıb.