Azərbaycan, Bakı, 16 sentyabr /Trend, müxbir İ.Xəlilova/
Azərbaycan Respublikası Dövlət Neft Fondu (ARDNF) dünya maliyyə bazarlarında qeyri-müəyyən vəziyyətlə əlaqədar olaraq, 2010-cu ildə Fondun vəsaitlərinin daha yüksək gəlirli və riskli maliyyə alətlərinə, xüsusilə də səhmlərə qoyuluşundan imtina edib. Bu barədə cümə axşamı ARDNF-in icraçı direktoru Şahmar Mövsümov deyib.
"İndi dünyada hələ də qeyri-müəyyən iqtisadi vəziyyət davam etməkdədir, odur ki, öz investisiya portfelimizi diversifikasiya etmək üçün dünya bazarlarında vəziyyətin yaxşılaşmasını gözləyəcəyik", - Neft Fondunun rəhbəri vurğulayıb.
Onun sözlərinə görə, cari ilin sonunadək Neft Fondunun aktivlərinin 21-22 milyard dollar səviyyəsində olacağı proqnozlaşdırılır. Hazırda ARDNF-in vəsaitləri 19 milyard dolları ötür.
"Fondun aktivlərinin artması, eləcə də investisiya siyasətinin dəyişməsi ARDNF vəsaitlərinin idarə edilməsi üçün yeni xarici menecerlərin cəlb edilməsinə imkan yaradacaq", - bir müddət əvvəl Mövsümov demişdi.
Bundan əvvəl Dünya Bankı (DB) ARDNF-ə öz investisiya siyasətinə yenidən baxmağı və vəsaitləri daha riskli maliyyə alətlərinə qoymağı təklif etmişdi. DB ekspertlərinin fikrincə, ARDNF kimi uzunmüddətli investisiya fondları (pensiya, dövlət fondları) öz vəsaitlərinin 30-40 faizini səhmlərə yatırır. Məsələn, Norveç Neft Fondunun səhmlər portfeli aktivlərinin 60 faizinə çatır.
10-20 il müddətinə olan belə uzunmüddətli investisiyalar həmişə özünü doğruldub, belə ki, onlardan əldə edilən gəlir istiqrazlardan əldə edilən gəlirdən çoxdur. Halbuki qısamüddətli perspektivdə (bir il ərzində) qiymətli kağızların dəyərinin yüksək dəyişkənliyi hətta mənfi gəlirliyə gətirib çıxarır, bu vəziyyət qısa müddət ərzində aradan qaldırılır və səhmlərin idarə edilməsindən əldə olunan gəlir bir neçə dəfə artır. Ölkə belə investisiya siyasətinə keçənədək, səhmlərin qiymətinin istənilən dəyişkənliyinə hazır olmalıdır.
İndiyədək ARDNF mühafizəkar investisiya siyasəti aparıb ki, bu da göstərilən dövrdə vəsaitlərin idarə edilməsi üçün platformanın formalaşması ilə bağlı olub. Lakin Fondun rəhbərliyi və beynəlxalq təşkilatlar anlayırlar ki, artıq gələcəkdə ölkəyə daha çox gəlir gətirəcək mürəkkəb maliyyə institutlarına investisiyaların yatırılması vaxtı gəlib çatıb.
Neft Fondu səhmlər portfelinin genişləndirilməsi üzrə planlarını dünya prosesləri ilə bağlı təxirə salıb. Bu qərar düzgün olub ki, bu da böhranın Neft Fondunun gəlirlərinə təsir etməməsi ilə sübut edilir, belə ki, səhmlərin qiyməti demək olar 50 faiz azalıb. Bundan əvvəl Fond 2009-cu ilin sonuna - 2010-cu ilin əvvəlinə böhranın azalması ilə investisiya siyasətinə yenidən baxa biləcəyinin mümkünlüyü barədə deyib.
2009-cu ilin yekunlarına görə səhmlərə Fondun investisya portfelinin yalnız 0,04 faizi yerləşdirilib.
Neft Fondu 2007-ci ildən etibarən RAMP (Reserve Assets management programme) proqramı ilə əməkdaşlıq etməyə başlayaraq, Dünya Bankının xəzinəsinin ixtiyarına 100 milyon dollar verib. Hazırda DB-nin xəzinəsinin ixtiyarında 114 milyon dollar var və bu məbləğ yerləşdirmələrdən əldə edilən gəlirlər sayəsində artıb.
RAMP proqramı 40 ildən çoxdur fəaliyyət göstərir.
Fondun menecerləri "Clarident" ("Credit Suisse"in bölməsi) və "Deutschebank Asset Management" banklarıdır.
2010-cu il iyulun 1-nə olan vəziyyətə görə, ARDNF-in aktivləri ilin əvvəli ilə (14 900,4 milyon dollar) müqayisədə 21,6 faiz artaraq, 18 122,3 milyon dollar təşkil edib.
Sentyabrın 16-na olan rəsmi məzənnə 0,8035 AZN/USD təşkil edir.