Azərbaycan, Bakı, 4 noyabr /Trend, müxbir Ə.Yusifzadə/
İranın azad iqtisadi zonası (AİZ) "Araz" layihəsi çərçivəsində Azərbaycan investisiya qoyuluşu və biznesin inkişafı üçün əsas ölkə kimi nəzərdən keçirilir. Bu barədə "Araz" AİZ-in rəhbəri Abbas Rəncbər Azərbaycanın Təbrizdəki baş konsulu Əli Əlizadə ilə görüşdə deyib.
"İki dövlət arasında iqtisadi və investisiya münasibətlərinin daha da inkişaf etdirilməsi hər iki ölkənin maraqlarına uyğun həyata keçiriləcək. Azərbaycan investorlarının "Araz" AİZ-də iştirakı üçün biz Azərbaycan, xüsusən də Naxçıvan Muxtar Respublikasının (NMR) istehsalçı və sahibkarları üçün investisiya mühitinin yaradılmasına hazırıq", - Rəncbər qeyd edib.
Onun sözlərinə görə, regionda səmərəli iqtisadi fəaliyyəti həyata keçirmək üçün lazımi infrastruktur yaradılıb.
"Araz" iqtisadi zonasının layihələri və investisiya imkanları barədə danışan Rəncbər Azərbaycanı Naxçıvanla və İran körfəzi ölkələri ilə birləşdirəcək Culfa-Aslandüz dəmiryol xəttinin tikintisinin əhəmiyyətini vurğulayıb.
"Ümid edirəm ki, yaxın vaxtlarda Azərbaycan hökuməti bu layihəni təsdiq edəcək və onun həyata keçirilməsinə başlanılacaq", - Rəncbər qeyd edib.
Onun sözlərinə görə, Tehran-Naxçıvan marşrutu üzrə aviaxəttin açılması da nəzərdən keçirilir. "Naxçıvanın Türkiyə və İranla qonşu olması bu strateji vacib regionun effektiv inkişafına imkan verir", - Rəncbər qeyd edib.
"Biz İran və Azərbaycan arasında iqtisadi və ticari münasibətlərin həcmindən tam razı deyilik və ölkələrimiz arasında ticari-iqtisadi əlaqələrin genişləndirilməsi məqsədilə səylər göstəririk", - Azərbaycanın Təbrizdəki baş konsulu Əlizadə qeyd edib.
Onun sözlərinə görə, Naxçıvan-Təbriz-Məşhəd dəmiryol xəttinin açılması məsələsi NMR-in Ali Məclisi nümayəndələrinin İrana səfəri zamanı müzakirə ediləcək.
