Özbəkistan, Daşkənd, 7 noyabr /Trend, xüsusi müxbirlər V.Javoronkova, N.İsmayılova/
Özbəkistan hökumətinin yüksək rütbəli nümayəndələri "Azersun Holding"in prezidenti Abdulbari Gözəl ilə görüş çərçivəsində ölkədə tələbatın müşahidə edildiyi holdinq məhsullarının ixracı sahəsində əməkdaşlıq haqqında təklif təqdim ediblər. Bu barədə bazar günü Trend-ə Daşkənddə olan "Azersun Holding"in marketinq direktoru Kazım Babayev məlumat verib. Görüş Özbəkistan paytaxtında keçirilən "Azərbaycan nailiyyətləri" Milli Sərgisi çərçivəsində keçirilib.
"Biz hələlik Özbəkistanda obyektlərin tikintisini planlaşdırmırıq, çünki bu, ciddi marketinq araşdırmaları tələb edir. Ölkə bazarında nəyə ehtiyac olduğu aydınlaşdırıldıqdan sonra rəhbərliyə məruzə təqdim olunacaq", - Babayev deyib.
Onun sözlərinə görə, Özbəkistanda zeytun yağına, keyfiyyətli çaya tələbat müşahidə olunur. Lakin burada qiymət və keyfiyyət məsələləri nəzərə alınmalıdır.
Babayev deyib ki, "Azersun Holding" sərgidə iştirakı uğurlu hesab edir.
"Azərbaycanın nailiyyətləri" Azərbaycanın xaricdə ilk Milli Sərgisidir. Ekspozisiyanın sahəsi 4550 kvadrat metr təşkil edir. Tədbirdə Azərbaycanın rəsmi şəxsləri və 160-dan şox müəssisə və təşkilatı iştirak edir.
